डाक खात्याचा गलथान कारभार

उपप्रादेशिक परिवहन कार्यालयाकडून १ ते २ महिन्यांपूर्वी पोस्ट करण्यात आलेले हजारो आरसी बूक व परवाना वाहनधारकांना डाक विभागातून प्राप्त न झाल्यामुळे वाहनधारक त्रस्त झाले आहेत.

वाहनधारक त्रस्त : वाहन नोंदणी पुस्तक व परवाने झाले गायबगडचिरोली : उपप्रादेशिक परिवहन कार्यालयाकडून १ ते २ महिन्यांपूर्वी पोस्ट करण्यात आलेले हजारो आरसी बूक व परवाना वाहनधारकांना डाक विभागातून प्राप्त न झाल्यामुळे वाहनधारक त्रस्त झाले आहेत. डाक विभागात याबाबत काहीही माहिती वाहनधारकांना दिली जात नाही, अशी तक्रार वाहनधारकांनी केली आहे.गडचिरोली येथे कॉम्प्लेक्स परिसरात उपप्रादेशिक परिवहन कार्यालय आहे. या कार्यालयातून नागरिकांनी नवीन वाहनांचे रजिस्ट्रेशन केले होते. तसेच काही नागरिकांनी वाहन परवान्यासाठी अर्जही केले. उपप्रादेशिक परिवहन कार्यालयाने या नागरिकांना पोस्टामार्फत संबंधित नोंदणी बूक व परवाने पाठविले. गडचिरोली डाक कार्यालयात सदर कागदपत्र पाठविण्यात आले. परिवहन विभाग शासनाने ठरविल्याप्रमाणे ५० रूपये फी आकारून हे कागदपत्र देतात व पोस्टाद्वारे ते पाठवितात. त्यानंतर वितरणाची जबाबदारी डाक विभागाची आहे. मात्र गडचिरोली डाक विभागात संबंधित कागदपत्र आलमारीमध्ये पडून असल्याची माहिती काही वाहनधारकांना मिळाली होती. त्यांनी डाक कार्यालयात जाऊन याची चौकशी केली. मात्र तेथे त्यांना प्रतिसाद मिळाला नाही. त्यामुळे आता वाहनधारक अडचणीत सापडले आहेत. यापूर्वीही आधारकार्ड पोस्ट कार्यालयात पडून होते. नागरिक स्वत: येऊन ते घेऊन जात होते. या पार्श्वभूमीवर आता डाक विभागाच्या अधिकाऱ्यांनी सदर कागदपत्र वितरण करण्याची व्यवस्था करावी, अशी मागणी वाहनधारकांनी केली आहे. यासंदर्भात ‘लोकमत’ने डाक कार्यालयात चौकशी केली असता, एकही जबाबदार अधिकारी येथे हजर मिळाला नाही. (जिल्हा प्रतिनिधी)