झाडावर नऊ तास चढून वाचविला स्वत:चा जीव

नदीच्या पुलावरून जवळपास दोन ते तीन फूट पाणी वाहत होते. याच पाण्यातून त्यांनी दुचाकी टाकली. मात्र पाण्याच्या प्रवाहात दुचाकी वाहून जाऊन एका झाडाला अडकली. दोघेही वाहून जात असताना नाल्यातील झाडाच्या फांदीला अडकले. या फांदीच्या आधाराने दोघेही झाडावर चढले. पाणी कमी होतपर्यंत प्रतीक्षा केल्याशिवाय दुसरा कोणताही पर्याय त्यांच्याजवळ नव्हता.

ठळक मुद्देमुस्का येथील घटना : गावकऱ्यांनी शनिवारी रात्री १२ वाजता जाऊन दोघांना काढले पुरातून बाहेर

घनश्याम म्हशाखेत्री ।लोकमत न्यूज नेटवर्कधानोरा : पुराच्या पाण्यात वाहून जात असताना झाडाचा आसरा मिळाला. त्याच झाडावर रात्रभर थांबून दोघांनी स्वत:चा जीव वाचविला. सदर घटना धानोरा तालुक्यातील मुस्का येथील आहे. त्या दोघांनाही गावकऱ्यांनी ७ सप्टेंबरच्या रात्री १२ वाजता सुखरूप बाहेर काढले. काळ आला होता मात्र वेळ आली नव्हती. याचा प्रत्यय या दोघांच्या बाबतीत आला.मुस्का येथील विनोद बोरकर व मनोहर बोरकर हे दोघे जण गावाजवळच असलेल्या सालेभट्टी येथे काही कामानिमित्त दुचाकीने शनिवारी सकाळी गेले होते. काम आटोपून दुपारी ३ वाजता गावाकडे परत येत होते. गावाजवळून डेडरी नदी वाहते. या नदीच्या पुलावरून जवळपास दोन ते तीन फूट पाणी वाहत होते. याच पाण्यातून त्यांनी दुचाकी टाकली. मात्र पाण्याच्या प्रवाहात दुचाकी वाहून जाऊन एका झाडाला अडकली. दोघेही वाहून जात असताना नाल्यातील झाडाच्या फांदीला अडकले. या फांदीच्या आधाराने दोघेही झाडावर चढले. पाणी कमी होतपर्यंत प्रतीक्षा केल्याशिवाय दुसरा कोणताही पर्याय त्यांच्याजवळ नव्हता. हे दोघेही पुरात अडकल्याची माहिती गावकºयांना मिळाली. मात्र पुराने वेढा घातला असल्याने गावकरी सुध्दा मदत करू शकत नव्हते. घटनास्थळ गावापासून दीड किमी अंतरावर होते. बचावाचे कोणतेही साधन गावकºयांजवळ उपलब्ध नव्हते. पूर थोडा कमी झाल्यानंतर सरपंच शालिक गावडे, आरोग्य विभागाचे कर्मचारी तिरूपती कोल्लुरी यांनी इतर गावकºयांच्या मदतीने घटनास्थळ गाठले. सुमारे कंबरभर पाण्यातून मार्ग काढत दोघांनाही सुखरूप वाचविले. बचाव कार्यात पंकेश गावडे, आकाश गावडे, संतोष मोहुर्ले, जितेंद्र मोहुर्ले, युवराज पटणे, राजू मोहुर्ले, अक्षय मोहुर्ले, शंभूलाल चाटारे, जगन मोहुर्ले, अल्पेश मोहुर्ले, विश्वनाथ मोहुर्ले, राजकुमार पटणे, तनवीर बोरकर, भाऊराव बोरकर, ऋषी बोरकर यांनी मदत केली. पूर ओसरल्यानंतर रविवारी दुचाकी आणण्यात आली.बचाव साहित्याची मागणीमुस्का गावाला दर पावसाळ्यात पुराचा वेढा बसतो. आवश्यक कामानिमित्त गावकºयांना जीव धोक्यात घालून बाहेर जावेच लागते. एखादा व्यक्ती पुरात अडकला असल्यास त्याला काढावे लागते. यासाठी ग्रामपंचायतीने तसेच इतर विभागाने नागरिकांना पुरापासून बचावाचे साहित्य उपलब्ध करून द्यावे, अशी मागणी गावकºयांनी केली आहे.