आमदारांनी केले अपंग आचलच्या यशाचे कौतुक

तालुक्यातील घाटी येथील कै. विठ्ठलराव बनपुरकर विद्यालयात शिकत असलेल्या आचल प्रदीप राऊत या विद्यार्थिनीला दोन्ही हात नसल्याने

मार्गदर्शन : शिक्षणाधिकाऱ्यांसह घाटी गावाला दिली भेटकुरखेडा : तालुक्यातील घाटी येथील कै. विठ्ठलराव बनपुरकर विद्यालयात शिकत असलेल्या आचल प्रदीप राऊत या विद्यार्थिनीला दोन्ही हात नसल्याने तिने उजव्या पायाने दहावीचा पेपर सोडवून ती विद्यालयातून प्रथम आली आहे. तिच्या या जिद्द, चिकाटी व मेहनतीचे आ. क्रिष्णा गजबे यांनी कौतुक केले. दहावीच्या परीक्षेत आचलने ७७.४० टक्के गुण मिळवून ती विद्यालयातून प्रथम आल्याचे वृत्त वर्तमानपत्रांमध्ये प्रकाशित होताच आ. क्रिष्णा गजबे यांनी आचलचे घर गाठून तिचा शाल, श्रीफळ, डिक्शनरी व भेटवस्तू देऊन सत्कार केला. यावेळी शिक्षणाधिकारी (माध्यमिक) उल्हास नरड, प्रा. प्रशांत तम्मेवार, भाजपाचे तालुकाध्यक्ष राम लांजेवार, जिल्हा उपाध्यक्ष विलास गावंडे, पं. स. सदस्य चांगदेव फाये, रामहरी उगले, किशोर पाचभाई, जलाल सय्यद आदी उपस्थित होते. याप्रसंगी शिक्षणाधिकारी उल्हास नरड यांनीही आचलच्या या यशाचे कौतुक केले. आचलने शारीरिक अपंगत्व व घरच्या आर्थिक परिस्थितीवर मात केली आहे. तिचे हे यश इतर विद्यार्थ्यांसाठी नक्कीच प्रेरणादायी आहे, असे गौरवोद्गार काढले. त्याचबरोबर तिच्या पुढील शिक्षणासाठी सर्वतोपरी सहकार्य करण्याचे आश्वासन दिले. यावेळी तिचे आईवडील व गावकरी उपस्थित होते. (तालुका प्रतिनिधी)