गडचिरोली : कमलापूरच्या हत्ती कॅम्पमध्ये गेल्या अर्धशतकापासून असलेल्या हत्ती कॅम्पमधील हत्तींना गुजरातमधील रिलायन्स ग्रुपच्या प्राणिसंग्रहालयात जाण्यापासून वाचविण्यासाठी बहुतांश सर्वच पक्षांचे पदाधिकारी सरसावले आहेत.
‘लोकमत’ने सर्वप्रथम ही माहिती सर्वांसमोर आणल्यानंतर, हत्ती हलविण्यास विरोध सुरू झाला. आता ‘आय सपोर्ट हत्ती कॅम्प’ या नावाने समाजमाध्यमावर मोहीम उघडण्यात आली असून, त्याला सर्व स्तरातून पाठिंबाही मिळत आहे. त्यामुळे हत्तींना येथून हलविण्याचा निर्णय फिरवावा लागण्याची शक्यता निर्माण होत आहे. ही मोहीम आणखी तीव्र होण्याची शक्यता आहे.
आदिवासी जिल्ह्यावर डोळा ठेवू नका
या जिल्ह्यातील हत्ती ही राज्य सरकारची प्रॉपर्टी आहे. ती दुसऱ्या राज्यातील खासगी प्राणिसंग्रहालयात घेऊन जाऊ देणार नाही. मोदीसरकार महाराष्ट्रातील अनेक चांगल्या गोष्टी गुजरातकडे पळविण्याचा प्रयत्न करत आहे. आता आमच्या आदिवासी जिल्ह्यावर त्यांनी डोळा ठेवू नये. हत्ती कॅम्पमुळे लोकांना थोडाफार का असेना, रोजगार मिळून चार पैसे मिळतात. पुढे पर्यटक वाढतील तसा रोजगारही वाढेल. त्यामुळे हत्ती असे सहजपणे जाऊ देणार नाही.
- आ. धर्मरावबाबा आत्राम, अहेरी
पालकमंत्र्यांना निवेदन
या भागातील जनभावना लक्षात घेता हत्तींना गुजरातला नेण्याची परवानगी देऊ नये, या प्रकरणात वनमंत्री या नात्याने मुख्यमंत्री उद्धव ठाकरे यांनी हस्तक्षेप करण्यासाठी त्यांच्याकडे पाठपुरावा करावा, अशी विनंती आपण पालकमंत्री एकनाथ शिंदे यांना निवेदन देऊन केली आहे. राज्यातील वनपर्यटकांसाठी हे एक आकर्षणाचे केंद्र आहे. असे असताना उद्योगपती मुकेश अंबानी यांच्या प्राणिसंग्रहालयासाठी गजचिरोली जिल्ह्याचे हे वैभव तिकडे पाठविणे योग्य नाही.
- किरण पांडव, जिल्हा समन्वयक, शिवसेना
जिल्हाधिकाऱ्यांना निवेदन
हत्तींच्या स्थलांतराची कार्यवाही त्वरित रोखण्यात यावी, यासाठी आंदोलन छेडण्याचा इशारा काँग्रेस पक्षाच्या वतीने सोमवारी जिल्हाधिकारी संजय मीना यांना निवेदनातून देण्यात आला. जिल्हाध्यक्ष महेंद्र ब्राह्मणवाडे यांच्या नेतृत्वात निवेदन देण्यासाठी प्रदेश काँग्रेसचे महासचिव डॉ. नितीन कोडवते, सोशल मीडिया प्रदेश महासचिव नंदू वाईलकर, तसेच शंकरराव सालोटकर, सतीश विधाते, सुनील चडगुलवार, रजनिकांत मोटघरे, हरबाजी मोरे, जितेंद्र मुनघाटे, संजय चन्ने, प्रतीक बारसिंगे, नदीम नाथानी, नरेश सोरते आदी पदाधिकारी उपस्थित होते.
शिवसेना पदाधिकारी सरसावले
याप्रकरणी शिवसेनेच्या जिल्ह्यातील पदाधिकाऱ्यांनीही आक्रमक भूमिका घेतली. सहसंपर्क प्रमुख अरविंद कात्रटवार म्हणाले की, हा हत्ती कॅम्प वन विभागासाठी आणि जिल्हावासीयांसाठी भूषण आहे. या कॅम्पमुळे गडचिरोली जिल्ह्याची राज्यात चांगली ओळख आहे. हा निर्णय तमाम पर्यटकांसाठी दुर्दैव आहे. शिवसेना महिला आघाडीच्या पूर्व विदर्भ संपर्क प्रमुख शिल्पा बोडखे यांनी पर्यटनमंत्री आदित्य ठाकरे यांना मेल पाठवून हत्तींना रोखण्याची मागणी केली. माजी जिल्हा संघटिका छाया कुंभारे व इतर पदाधिकाऱ्यांनी आंदोलनाचा इशारा दिला.