गडचिरोली : वनविभागाच्यावतीने ई-निविदा लिलाव प्रक्रिया राबवून जिल्ह्यातील पाचही वनविभागातील तेंदू युनिटची विक्री करण्याचा प्रयत्न करण्यात आला. यात जिल्ह्यातील एकूण १६0 तेंदू युनिटपैकी ११0 तेंदू युनिटची खरेदी कंत्राटदारांनी केली आहे. उर्वरित ५0 तेंदू युनिटची लिलाव प्रक्रियेदरम्यान ग्रामसभांनी पुढाकार घेऊन १४ तेंदू युनिट खरेदी केली असल्याची माहिती वनविभागाच्या सुत्रांकडून मिळाली आहे. ग्रामसभेनी खरेदी केलेल्या तेंदू युनिटमध्ये गडचिरोली वनविभागातील महावाडा, सावरगाव, आलापल्ली वनविभागातील रेगडी, वेगनूर, बोलेपल्ली, कोटेपल्ली, मट्टीगुड्डा, वेडमपल्ली, वडसा वनविभागातील वैरागड, भामरागड वनविभागातील एटापल्ली, गेदा आणि सिरोंचा वनविभागातील छल्लेवाडा, रेगुलवाही, असरअल्ली (अंकिसा) आदींचा समावेश आहे. प्रलंबित तेंदू युनिटबाबत दुर्गम भागातून अनेक मजुरांनी ओरड निर्माण केली होती. याशिवाय त्या-त्या भागातील लोकप्रतिनिधींनी प्रलंबित तेंदू युनिट तत्काळ निकाली काढून रोजगार उपलब्ध करून देण्याची मागणी लावून धरली. असे असतानासुध्दा कंत्राटदार दुर्गम भागातील तेंदू युनिट खरेदी करण्यासाठी धजावत नव्हते. अखेर मजुरांच्या रोजगाराचा विचार करून १४ गावातील ग्रामसभांनी पुढाकार घेतला. प्रलंबित ५0 पैकी १४ तेंदू युनिटची खरेदी ग्रामसभांनी केली आहे. आता वनविभागाच्यावतीने लिलाव प्रक्रिया समाप्त करण्यात आली आहे. जिल्ह्यात ३६ तेंदू युनिट कायम राहिले असून या तेंदू युनिटच्या हद्दीत यंदा तेंदू संकलन होणार नसल्याची माहिती आहे. सामुहिक मालकी हक्काच्या अधिकारानुसार ग्रामसभांनी तेंदू युनिट खरेदी केली आहे. तेंदू संकलनाबाबत ग्रामसभेचा आर्थिक व्यवहार प्रत्यक्ष वनविभागाशी होणार आहे. ग्रामसभांनी खरेदी केलेले तेंदू युनिटचे काम सुरू झाल्यामुळे तेंदूसंकलन करणार्या मजुरांना रोजगार मिळाला आहे. मजुरांचे जत्थे जिल्ह्यात दाखल झाले आहे. (स्थानिक प्रतिनिधी)
रोजगार निर्मितीत ग्रामसभेचा पुढाकार
By admin | Updated: May 15, 2014 23:32 IST