गावकऱ्यांनी केला प्रशासनाकडे संघर्ष : गावाला मिळाले बांबू विक्रीचे अधिकारएटापल्ली : गावकऱ्यांच्या संघर्षानंतर वन विभागाने तालुक्यातील गट्टेपल्ली ग्रामसभेला बांबू विक्रीचे अधिकार बहाल केले असून गावकऱ्यांच्या हातात टीपी बूक दिले आहे. शासनाच्या निर्णयानुसार गट्टेपल्ली ग्रामसभेने कक्ष क्र. २४२ व २४३ मध्ये बांबूच्या कापणीस सुरुवात केली होती. बांबूची विक्री करण्यासाठी टीपी उपलब्ध करून देण्यात यावी, अशी मागणी जिल्हाधिकारी, मुख्य कार्यकारी अधिकारी, मुख्य वनसंरक्षक यांच्याकडे केली होती. परंतु हालेवारा ग्राम पंचायत अंतर्गत येत असलेल्या गट्टेपल्ली गावाचा प्रस्ताव प्राप्त झाला नसल्याचे उत्तर प्रशासनाकडून देण्यात आले. त्यामुळे ग्रामसभेचे सल्लागार तथा राष्ट्रीय जनहितवादी युवा समितीचे सुरेश बारसागडे यांच्या नेतृत्त्वात गावकऱ्यांनी जिल्हाधिकारी, मुख्य कार्यकारी अधिकारी, मुख्य वनसंरक्षक, उपवनसंरक्षक यांच्याकडे प्रत्यक्ष जाऊन झालेली चूक लक्षात आणून दिली. त्यानंतर गट्टेपल्लीचा समावेश पर्याय क्रमांक दोनच्या यादीत करण्यात आला. उपवनसंरक्षकांच्या निर्देशानुसार सीएफ कंद, पचारे, आरएफओ गिते, बारस्कर यांनी टीपी बूक तयार केले. सदर टीपी बूक आलापल्ली येथे आयोजित कार्यक्रमात ग्रामसभेचे अध्यक्ष मधुकर पुडो, घिसु पुडो व ग्रामसभेचे सल्लागार सुरेश बारसागडे यांना प्रदान करण्यात आला.टीपी बूक प्राप्त झाल्याने गट्टेपल्ली ग्रामसभेला बांबू विक्रीचे अधिकार प्राप्त झाले आहेत. सदर टीपी मिळवून देण्यासाठी ग्रामसेवक उईके, विस्तार अधिकारी हाडके, रामटेके, संवर्ग विकास अधिकारी लुटे, ठेपाले यांच्यासह गावातील इतरही नागरिकांनी सहकार्य केले. गावकऱ्यांना बांबू विक्रीचे रितसर अधिकार प्राप्त झाल्याने त्यांच्या श्रमाची योग्य किंमत मिळण्याचा मार्ग मोकळा झाला आहे. (तालुका प्रतिनिधी)
गट्टेपल्लीला मिळाली बांबूची टीपी
By admin | Updated: June 7, 2015 02:02 IST