आष्टी, आलापल्लीत अपघात : दुचाकीला दिली धडकआष्टी/आलापल्ली : दोन वेगवेगळ्या अपघातात गुरूवारी पाचजण जखमी झाल्याची घटना आष्टी व आलापल्ली येथे घडली. दुचाकीला टाटा मॅजीक व ट्रकने धडक दिल्याने हे अपघात झालेत. आष्टी येथील महात्मा ज्योतीबा फुले महाविद्यालयाजवळ गुरूवारी सकाळी ९ वाजताच्या सुमारास ट्रकने दुचाकीला जोरदार धडक दिली. या धडकेत दुचाकीवरील तीन युवक गंभीररित्या जखमी झाले असून त्यांना चंद्रपूर येथील रुग्णालयात हलविण्यात आले आहे. सूर्यकांत आरके (२०) रा. किष्टापूर, सुरेंद्र शेडमाके (२३), विलास तलांडे (२५) दोघेही रा. मल्लेझरी अशी जखमींची नावे आहेत. चंद्रपूरवरून सिमेंटने भरलेला एमएच-२६-एच-५८६९ या क्रमांकाचा ट्रक आलापल्लीकडे जात होता. तर एमएच-३३-एच-१७७९ क्रमांकाच्या दुचाकीने युवक मल्लेझरीवरून आष्टीकडे येत होते. दरम्यान फुले महाविद्यालयाजवळ ट्रक व दुचाकी यांची जोरदार धडक झाली. या धडकेत तिन्ही युवकांना जबर मार लागला. यातील एकाचे दोन्ही पाय तुटले आहेत तर इतर दोघेसुद्धा गंभीर जखमी झाले आहेत. त्यांना तत्काळ चंद्रपूर येथील रुग्णालयात भरती करण्यात आले. अपघात होताच ट्रकचालकाने पोलीस स्टेशन गाठले. अपघातातील जखमींना महात्मा ज्योतीबा फुले महाविद्यालयाचे प्राध्यापक रवी शास्त्रकार व राष्ट्रीय सेवा योजनेच्या विद्यार्थ्यांनी तत्काळ वाहन बोलवून आष्टी येथील ग्रामीण रुग्णालयात भरती केले. मृणाल वाकुडकर, नागराज मेडपल्लीवार, चंद्रशेखर झाडे, शरद मडावी यांनी जखमींना मदत केली. याबद्दलची माहिती पोलिसांना दिल्यांनतर पोलीस कर्मचारी पोटवार व फुलझेले यांनी घटनास्थळ गाठून पंचनामा केला.तर दुसऱ्या एका अपघातात आलापल्ली-चंद्रपूर मार्गावरील राम मंदिराजवळ गुरूवारी १२.३० वाजताच्या सुमारास टाटा मॅजिक या वाहनाने दुचाकीला धडक दिली. चारचाकी वाहन चंद्रपूरवरून आलापल्लीच्या दिशेने येत होते. तर त्याच दिशेने जाणाऱ्या शंकर पाणेम (४०) हे जखमी झाले. त्यानंतर त्याच वाहनाने समोरून येणाऱ्या दुचाकीलाही धडक दिली. या दुचाकीवर बसलेली महिलासुद्धा जखमी झाली. सदर महिलेचे नाव कळू शकले नाही. शंकर पाणेम व त्या महिलेला चंद्रपूर येथे हलविण्यात आले आहे. या घटनेचा पुढील तपास अहेरी पोलीस स्टेशनचे पोलीस निरीक्षक संजय मोरे यांच्या मार्गदर्शनात सुरू आहे. (प्रतिनिधी)
दोन अपघातात पाचजण जखमी
By admin | Updated: July 17, 2015 01:33 IST