गडचिराेली : एटापल्ली- आलापल्ली मार्गावर मद्दीगुडम-रामय्यापेठा ह्या गावादरम्यान दाेन दुचाकींची समाेरासमाेर धडक झाल्याने या घटनेत दुचाकीस्वार टेलर्स व्यावसायिक ठार तर दुसऱ्या दुचाकीवरील दाेघेजण गंभीर जखमी झाले ही, घटना अहेरी तालुक्याच्या हद्दीत शुक्रवार १५ सप्टेंबर राेजी दुपारी १२:३० वाजताच्या सुमारास घडली.
किशोर निलीवार (५२) रा. एटापल्ली असे अपघातात ठार झालेल्या व्यावसायिकाचे नाव आहे. चैतु आरे मडावी (३५), बंडू कारे मडावी (३५) रा. पंदेवाही ता. एटापल्ली हे दाेघे गंभीर जखमी झाले. एटापल्ली येथील पद्मशाली समाजाचे तालुकाध्यक्ष तथा टेलर्स व्यावसायिक किशोर निलीवार हे एटापल्लीवरून आलापल्ली येथे काही कामानिमित्त दुचाकीने जात होते. याचवेळी चैतू मडावी व बंडू मडावी हे दोघेही एका दुचाकीने आलापल्लीवरून एटापल्लीकडे येत होते. या दोन्ही मोटसायकलींची मद्दीगुडम-रामय्यापेठा गावादरम्यान समोरासमोर धडक झाली. यात किशाेर निलीवार हे जागीच ठार झाले. तर चैतू मडावी व बंडू मडावी हे दाेघेही गंभीर जखमी झाले. जखमींना अहेरी येथील उपजिल्हा रुग्णालयात उपचारार्थ दाखल करण्यात आले. अपघात एवढा जाेरदार हाेता की, एका दुचाकीचे समोरचे चाक दुचाकीपासून वेगळे झाले. दाेन्ही जखमींना सध्या चंद्रपूर येथे उपचारार्थ दाखल केले. निलीवार यांच्या पश्चात पत्नी, तीन मुले व नातवंड आहेत.
नामकरण व तान्हा पाेळ्यावर विरजनकिशाेर निलीवार यांच्या नातवंडाचा नामकरण विधी दाेन दिवसांपूर्वीच एटापल्लीत झाला हाेता. कुटुंबात आनंद असतानाच निलीवार यांच्या मृत्यूने शाेककळा पसरली. त्यांच्या मृत्युची बातमी कळताच गावात तान्हा पोळा भरविला नाही. शनिवारला व्यापारपेठ बंद ठेवून श्रद्धांजली वाहण्यात आली. शुक्रवारी याच मार्गावर दोन दुचाकींचा असाच अपघात होऊन दोन युवक जखमी झाले हाेते.