शिवसेनेचे आंदोलन : १५ खरेदी केंद्रावरील धान उत्पादक अडचणीत कोरची : मागील पाच महिन्यांपासून थकलेले धानाचे चुकारे देण्यात यावे, या मागणीसाठी शिवसेनेच्या पुढाकाराने कोरची-कुरखेडा मार्गावर शेकडो शेतकऱ्यांनी मंगळवारी सकाळी चक्काजाम आंदोलन केले. यामुळे मार्गावरील वाहतूक ठप्प झाली होती.आदिवासी विविध कार्यकारी सहकारी संस्थांच्या वतीने कोरची तालुक्यातील वडेगाव, मनेली, बेतकाठी, बोरी, कोठरा, कोटगुल, गॅरापत्ती, रामगड, पुराडा, खेडेगाव, येंगलखेडा, मालेवाडा, चरवीदंड, कोरची या १५ ठिकाणी सुरू करून धानाची खरेदी करण्यात आली. ३१ मार्चपर्यंत सुमारे १३ कोटी ५३ लाख ६० हजार रूपयांचे १९ हजार ४२९ क्विंटल धान खरेदी करण्यात आले. मात्र मागील पाच महिन्यांपासून शेतकऱ्यांना धानाचे पैसे देण्यात आले नाही. खरीप हंगामाला सुरूवात झाली असतानाही धानाचे चुकारे न झाल्याने शेतकरी आर्थिक अडचणीत आला आहे. ही गंभीर परिस्थिती शासनाच्या लक्षात आणून देऊन शेतकऱ्यांचे धानाचे चुकारे तत्काळ देण्यात यावे, या मागणीसाठी शिवसेनेच्या पुढाकाराने आंदोलन करण्यात आले. आंदोलनानंतर उपप्रादेशिक कार्यालय कोरचीचे अधिकारी बालप्रसाद बरमकर यांनी आंदोलकांशी चर्चा केली. चुकारे आठ दिवसांत देण्यात येतील, असे आश्वासन दिले. त्यानंतर आंदोलन मागे घेण्यात आले. आंदोलनाचे नेतृत्त्व उपजिल्हा प्रमुख नंदकिशोर वैरागडे, दामेंद्र येवले, तालुका प्रमुख रमेश मानकर, रामसुराम काटेंगे, कृष्णा नरडंगे, सुरेश सोरते, तेजस मेश्राम, नरेंद्र सलामे, शांताराम जमकातन, दलसाय कुमरो, सुदू कोरचा, तुलाराम काटेंगे, तिलक उईके, सावजी बोगा आदी उपस्थित होते. आंदोलनामुळे कोरची-कुरखेडा मार्गावरील वाहतूक काही काळ ठप्प झाली होती. (तालुका प्रतिनिधी)
धानाच्या चुकाऱ्यासाठी कोरचीत चक्काजाम
By admin | Updated: June 24, 2015 02:35 IST