लाेकमत न्यूज नेटवर्क
आरमोरी : जिल्हा अधीक्षक कृषी अधिकारी भाऊसाहेब बऱ्हाटे यांनी वैरागड येथील शेतकरी नेताजी बोडणे यांच्या हिरापूर रिठ येथील शेतशिवारातील फळ लागवडीची ३१ जानेवारी रोजी पाहणी केली. याशिवाय आरमोरी तालुक्यातील शेताच्या बांधावर जाऊन पिकांची पाहणी करुन शेतकऱ्यांना विस्तृत मार्गदर्शन केले.
तालुक्यातील वैरागड, हिरापूर रिठ, शिवणी खुर्द, मानापूर व इतर अनेक गावांना भेटी देऊन जिल्हा अधीक्षक कृषी अधिकारी बऱ्हाटे यांनी फळलागवड, भाजीपाला, तेलवर्गीय पिके, कडधान्य, रब्बी धानपीक, मका यासारख्या पिकांची पाहणी केली. तसेच शेतकऱ्यांना पीक लागवड, मशागत, कीड नियंत्रण याविषयी माहिती दिली. याशिवाय शासनाच्या वतीने शेतकऱ्यांसाठी असलेल्या विविध योजनांची शेताच्या बांधावर माहिती दिली.
वैरागड येथील शेतकरी नेताजी बोडणे यांनी त्यांच्या हिरापूर रिठ येथील शेतात सलग २० आर. जागेवर दशेरी आणि लंगडा या आंब्यांच्या झाडांची लागवड केली. या शेतकऱ्याने ८० झाडांची लागवड करून झाडांची जोपासना करुन इतर शेतकऱ्यांसमोर एक आदर्श निर्माण केला. याची दखल घेऊन बऱ्हाटे यांनी नेताजी बोडणे या शेतकऱ्याच्या शेतावर जाऊन हितगुज साधत फळ लागवडीविषयी जाणून घेतले. याबाबत चौकशी करत इतरही कृषिविषयक बाबींवर माहिती दिली. यावेळी आरमोरी तालुका कृषी अधिकारी टी.डी.ढगे, मंडळ कृषी अधिकारी जी.एन. जाधवर, कृषी सहाय्यक कोविद मडकाम, शेतकरी नेताजी बोडणे, नामदेव बोडणे, नरेंद्र बावनकर उपस्थित होते. याशिवाय आनंदराव बावनकर यांनी शेतात मका पिकाची लागवड केली. त्याची सुद्धा जिल्हा अधीक्षक कृषी अधिकारी बऱ्हाटे यांनी पाहणी केली.
तालुक्यातील शिवणी खुर्द येथील शेतकरी सोनू साखरे यांनी शेतामध्ये करडई या तेलवर्गीय पिकाची लागवड केली. या पिकाचीसुद्धा त्यांनी पाहणी केली. आरमोरी तालुक्यात कडधान्यांचेसुद्धा माेठ्या प्रमाणात उत्पादन घेतले जाते. याची दखल घेऊन त्यांनी मानापूर येथील देवेंद्र मोरघडे यांच्या शेतावर जाऊन हरभरा पिकाची पाहणी केली. शिवाय शेतकऱ्यांसाेबत संवाद साधून त्यांच्या अडीअडचणी जाणून घेतल्या. मोह फुलांविषयी माहिती दिली. मोहफुलापासून मिळणारे वार्षिक उत्पन्नावर चर्चा करून मोहफुलापासून तयार केलेले लाडू, रोग प्रतिकार शक्ती वाढविण्यासाठी त्यामध्ये असलेल्या विविध घटकांची माहिती दिली.