न्यायालयाचा निर्वाळा : अविश्वास ठरावावरील स्थगिती उठविलीचामोर्शी : चामोर्शी पं. स. चे उपसभापती केशव भांडेकर यांच्या विरूद्ध इतर पं. स. सदस्यांनी १० जून रोजी अविश्वास प्रस्ताव पारित केला होता. त्यानंतर उच्च न्यायालयाच्या नागपूर खंडपीठाच्या आदेशानुसार ठरावाला स्थगिती देण्यात आली होती. मात्र ९ जुलैच्या न्यायालयीन आदेशान्वये अविश्वास प्रस्तावावरही स्थगिती उठविल्याने पं. स. उपसभापती केशव भांडेकर यांना पायउतार व्हावे लागले आहे.१० जून रोजी १६ सदस्यसंख्या असलेल्या पं. स. च्या बैठकीत १३ सदस्य उपस्थित होते. अविश्वास ठरावाच्या बाजुने १२ सदस्यांनी मतदान केले. यामध्ये भाजपचे पाच, राकाँ दोन, युवाशक्ती दोन, अपक्ष दोन व काँग्रेसच्या एका पं. स. सदस्याचा समावेश होता. अविश्वास प्रस्ताव पारित झाल्यानंतर मुंबई उच्च न्यायालयाच्या नागपूर खंडपीठात पुनर्विचार याचिका दाखल करण्यात आली होती. या प्रकरणातील निर्णयास अधीन राहून प्रकरणाचा निकाल लागेपर्यंत असा ठराव पारित झाल्याची अंमलबजावणी करता येणार नाही, असे आदेश न्यायालयाने दिले होते. त्यामुळे अविश्वास प्रस्तावास स्थगिती देण्यात आली होती. मात्र न्यायालयाने सदर प्रस्तावावरील स्थगिती उठविल्याने पंचायत समितीचे उपसभापती केशव भांडेकर यांना पदावरून पायउतार व्हावे लागले आहे. (शहर प्रतिनिधी)
चामोर्शीचे पं. स. उपसभापती पायउतार
By admin | Updated: July 16, 2015 02:05 IST