आसरअल्लीच्या ठाणेदारास धक्काबुक्की

दुसऱ्याच्या जमिनीवर अतिक्रमण केल्याप्रकरणी चौकशीसाठी ठाण्यात बोलविले असता,...

आसरअल्ली : दुसऱ्याच्या जमिनीवर अतिक्रमण केल्याप्रकरणी चौकशीसाठी ठाण्यात बोलविले असता, चंद्रशेखर अर्जण्णा पुलगम (३६) याने ठाणेदार पी. जी. खाटपे यांच्यासोबत वाद घालून धक्काबुक्की केली. या प्रकरणी पोलिसांनी चंद्रशेखरच्या विरोधात गुन्हा दाखल करून अटक केली. आसरअल्ली येथील रहिवासी सांबय्या तोडपुनूरी व गौरीशंकर बैरी यांच्या मालकीच्या जमिनीवर चंद्रशेखर अर्जना पुलगम, गोपी मलय्या कोठारी, लक्ष्मी किष्टय्या पलनाटी, समंक्का समय्या गंप्पा, चंद्रकला लंगारी यांच्या विरोधात आसरअल्ली पोलीस स्टेशनमध्ये तक्रार दाखल केली. त्यानुसार आसरअल्लीच्या प्रभारी ठाणेदारांनी सगळ्यांना ठाण्यामध्ये बोलाविले. अतिक्रमणाबाबत विचारणा करीत असताना चंद्रशेखर पुलगम याने वाद घालून ठाणेदारांना धक्काबुक्की करण्यास सुरूवात केली. दरम्यान ठाण्यातील पोलीस कर्मचाऱ्यांनी हा वाद सोडविला. चंद्रशेखरच्या विरोधात तक्रार करून गुन्हा दाखल केला. (वार्ताहर)