गडचिराेली : विविध याेजनांच्या लाभासाठी व अनेक महत्त्वाच्या कामात पुरावा म्हणून आधारकार्डचा वापर केला जाताे. केंद्र व राज्य सरकारने प्रत्येक नागरिकांसाठी आधारकार्ड हे ओळखपत्र अत्यावश्यक केले आहे. गडचिराेली जिल्ह्यात सर्व मिळून शासनमान्य अधिकृत ९० पेक्षा अधिक आधारकार्ड केंद्रे आहेत. सद्य स्थितीत ५५ आधारकार्ड केंद्रे सुरू आहेत. गडचिराेली जिल्ह्यात आधारकार्ड अद्ययावत करण्याचे प्रमाण ७५ टक्के आहे.
केंद्र व राज्य सरकारने आधारकार्डला अनन्यसाधारण महत्त्व दिले आहे. नागरिकांकडे विविध प्रकारचे ओळखपत्र आहेत. यामध्ये वाहन परवाना, निवडणूक ओळखपत्र, बॅंक पासबुक, काम करीत असलेल्या अस्थापनाकडून मिळालेले ओळखपत्र, रेशन कार्ड व इतर अनेक प्रकारची ओळखपत्रे पुरावा म्हणून जाेडली जातात. मात्र शासनाने आधारकार्ड अत्यावश्यक केले आहे. आधारकार्डाशी बॅंक खाते क्रमांक व गॅस सिलिंडरसाेबत लिकिंग केले. शिवाय शिधापत्रिकाधारकांचे आधारकार्ड क्रमांक लिकिंग केले आहे. विविध याेजनांच्या अंमलबजावणीत सुसूत्रता यावी, दस्तावेजातील गैरप्रकार थांबविता यावेत, एकाच ओळखपत्रावरून सर्व बाबींची पडताळणी करणे शक्य हाेत नाही. त्यामुळे शासनाने प्रत्येक नागरिकाला आधारकार्ड अत्यावश्यक केले आहे.
गडचिराेली जिल्ह्यात राज्य सरकारचे अर्थात जिल्हा प्रशासनाचे एकूण ५१ अधिकृत आधारकार्ड केंद्रे आहेत. यापैकी ३२ केंद्रे सुरू असून, ११ केंद्रे बंद आहेत. विविध बॅंकांची ११, तर पाेस्ट विभागाची ९ केंद्रे आहेत. याशिवाय स्कूल एज्युकेशन ॲण्ड स्पाेर्टस‌् एजन्सीची मान्यता असलेले गडचिराेली व धानाेरा येथील गटसाधन केंद्रात आधारकार्ड केंद्र आहेत. केंद्र सरकारच्या अखत्यारित असलेले सीएससी म्हणजे काॅमन सर्व्हिस सेंटरचे एक आधारकार्ड केंद्र आहे.
बाॅक्स...
काेणाचे किती केंद्र
जिल्हा प्रशासन ५१
बॅंक ११
पाेस्ट ऑफिस ९
बाॅक्स...
यासाठी करावे लागते आधार नूतनीकरण
- नवजात बालकांच्या बाेटांचे ठसे याेग्यरित्या उमटत नाहीत. शिवाय डाेळ्यांचा लॅटिना घेता येत नाही. त्यामुळे बालकांचे आधारकार्ड पाच वर्षानंतर अपडेट करावे लागते. त्यानंतर बालक जसजसा माेठा हाेताे, तशा बाेटाच्या रेषा बदलतात. त्यामुळे १५ वर्षांनंतर बालकाचे आधारकार्ड पुन्हा अपडेट करावे लागते. पाच वर्षांपर्यंत अपडेटसाठी काेणतेही शुल्क आकारले जात नसल्याचे जिल्हा प्रशासनाच्या वतीने सांगण्यात आले.
- याशिवाय जुनी माहिती, पत्ता, माेबाईल नंबर, ई-मेल आयडी, लग्नानंतरचे नाव, वय, जन्म तारीख, छायाचित्र आदींची आधारकार्डमध्ये सुधारित नाेंदणी करण्यासाठी आधारकार्ड अपडेट करावे लागते. बायाेमेट्रिक व डेमाेग्राॅफिक अशा दाेन प्रकारचे बदल आधारकार्डमध्ये करता येतात. बायाेमॅट्रिकसाठी १०० रुपये व डेमाेग्राॅफिक्ससाठी ५० रुपये अपडेट शुल्क घेतले जाते.