मुख्यमंत्री योगी आदित्यनाथ यांना भावला उत्तर प्रदेशात चित्रपट ‘करमुक्त’ घोषित!

मुख्यमंत्री योगी आदित्यनाथ यांनी चित्रपट पाहिल्यानंतर संपूर्ण राज्यात तो करमुक्त केला आहे.

अभिनेता सिद्धार्थ गुप्ता आणि सुष्मिता भट यांची मुख्य भूमिका असलेला 'कृष्णावतारम' हा चित्रपट सध्या बॉक्स ऑफिसवर धुमाकूळ घालत आहे. या चित्रपटाच्या यशात आता आणखी एक मोठी भर पडली आहे. उत्तर प्रदेशचे मुख्यमंत्री योगी आदित्यनाथ यांनी हा चित्रपट पाहिल्यानंतर संपूर्ण राज्यात तो 'करमुक्त' (Tax-Free) करण्याची घोषणा केली आहे. या निर्णयामुळे चित्रपटाचे निर्माते आणि चाहत्यांमध्ये आनंदाचे वातावरण आहे.

लखनौमध्ये या चित्रपटासाठी एका विशेष शोचे आयोजन करण्यात आले होते. याप्रसंगी मुख्यमंत्री योगी आदित्यनाथ यांच्यासह उत्तर प्रदेशच्या राज्यपाल श्रीमती आनंदीबेन पटेल, उपमुख्यमंत्री केशव प्रसाद मौर्य आणि ब्रजेश पाठक, कॅबिनेट मंत्री, भाजप प्रदेशाध्यक्ष पंकज चौधरी आणि अनेक लोकप्रतिनिधी उपस्थित होते. चित्रपट पाहिल्यानंतर मुख्यमंत्र्यांनी चित्रपटाच्या विषयाचे आणि सादरीकरणाचे भरभरून कौतुक केले.

'कृष्णावतारम'ची कथा जगन्नाथ पुरी येथून सुरू होते. मंदिरातील भक्तांना एक गुरू भगवान कृष्णाच्या जीवनातील विविध पैलू आणि कथा सांगत असताना हा चित्रपट प्रेक्षकांना पौराणिक काळात घेऊन जातो. श्रीकृष्णाचे जीवन, त्यांचे विचार आणि मानवी कल्याणासाठी त्यांनी दिलेला संदेश अतिशय प्रभावीपणे पडद्यावर मांडण्यात आला आहे. सिद्धार्थ गुप्ताने साकारलेली कृष्णाची भूमिका प्रेक्षकांच्या पसंतीस उतरली आहे.

करमुक्त झाल्यामुळे कमाईत वाढ होणार
उत्तर प्रदेशसारख्या मोठ्या राज्यात चित्रपट करमुक्त झाल्यामुळे तिकिटांचे दर कमी होतील, परिणामी जास्तीत जास्त प्रेक्षक हा चित्रपट पाहण्यासाठी चित्रपटगृहात जातील. यामुळे 'कृष्णावतारम'च्या एकूण कमाईला मोठी चालना मिळण्याची शक्यता वर्तवली जात आहे.