डिजिटल सुधारणा गुणांकनात मुंबई विद्यापीठ अव्वल; पुणे विद्यापीठ नवव्या क्रमांकावर

उच्च व तंत्र शिक्षण विभागाने हे गुणांकन अधिकृत संकेतस्थळावर प्रसिद्ध केले आहे.

लोकमत न्यूज नेटवर्क, मुंबई: राज्यातील एकूण १३ विद्यापीठांपैकी डिजिटल व प्रशासकीय सुधारणा निकषांमध्ये मुंबई विद्यापीठाने प्रथम क्रमांक पटकाविला आहे. उच्च व तंत्र शिक्षण विभागाने हे गुणांकन अधिकृत संकेतस्थळावर प्रसिद्ध केले आहे.

राज्यातील विद्यापीठांमध्ये प्रशासनिक कामकाज अधिक पारदर्शक, गतिमान व डिजिटल करण्याच्या उद्देशाने उच्च शिक्षण विभागाने ठरावीक निकष निश्चित केले होते. या निकषांनुसार करण्यात आलेल्या मूल्यमापनात मुंबई विद्यापीठाने ८० गुण मिळवीत राज्यात अव्वल स्थान मिळविले आहे. या मूल्यमापनात कर्मचारी सेवा पुस्तिका डिजिटल करणे, सेवा आदेशांची ऑनलाईन नोंद, पदोन्नती प्रक्रिया सुलभ करणे, सेवा नियमांशी संबंधित माहिती पोर्टलवर अद्ययावत ठेवणे, तसेच या प्रणालींसाठी देण्यात आलेले प्रशिक्षण, आदी बाबींचा समावेश करण्यात आला होता.

गुणांकन यादीत एसएनडीटी महिला विद्यापीठ, मुंबई ७७ गुणांसह दुसऱ्या क्रमांकावर आहे. गोंडवाना विद्यापीठ, गडचिरोलीने ६९ गुण मिळवत तिसरा क्रमांक पटकाविला आहे. यशवंतराव चव्हाण महाराष्ट्र मुक्त विद्यापीठ, नाशिक ६८ गुणांसह चौथ्या क्रमांकावर आहे, तर कवयित्री बहिणाबाई चौधरी उत्तर महाराष्ट्र विद्यापीठ, जळगाव आणि शिवाजी विद्यापीठ, कोल्हापूर या दोन्ही विद्यापीठांनी ६७ गुण मिळवीत संयुक्तपणे पाचवा क्रमांक मिळविला आहे.

पुणे विद्यापीठ नवव्या क्रमांकावर

स्वामी रामानंद तीर्थ मराठवाडा विद्यापीठ ६५ गुणांसह सहाव्या क्रमांकावर आहे. संत गाडगेबाबा अमरावती विद्यापीठ आणि कवी कुलगुरू कालिदास संस्कृत विद्यापीठ, रामटेक ही दोन्ही विद्यापीठे सातव्या क्रमांकावर आहेत. पुण्यश्लोक अहिल्यादेवी होळकर सोलापूर विद्यापीठ, डॉ. बाबासाहेब आंबेडकर मराठवाडा विद्यापीठ, छत्रपती संभाजीनगर  राष्ट्रसंत तुकडोजी महाराज नागपूर विद्यापीठ आठव्या क्रमांकावर, तर सावित्रीबाई फुले पुणे विद्यापीठ नवव्या क्रमांकावर आहे.