दिगू, छत्री आणि नागपूर अधिवेशन

पत्रकार दिगू (सिंहासनमधील नव्हे) यानं खिन्न मनानं छत्री उचलून बॅगेत भरली. यावेळी नागपूरच्या अधिवेशनाला जाताना त्याची बॅग बरीच फुगली होती. पावसात नाईट ड्रेस, बनियान, रुमाल, मोजे आदी कपडे वाळणार नसल्यानं दिगूनं कपड्यांचे पाच-पाच सेट भरले होते. दिगूच्या लग्नातला ब्लेझर कपाटात लटकवला होता. हिवाळी अधिवेशनाला जाताना दिगू मोठ्या उत्साहानं तो घेऊन जायचा. त्यामुळे त्याच्या वापराचा अनुशेष भरून निघत होता.दिगू दिसायला फारच साधा असल्यानं आणि त्याच्या शरीराला आकार उकार नसल्यानं तो ब्लेझर एखाद्या बुजगावण्याला चढवल्यासारखा वाटायचा. मात्र हिवाळी अधिवेशनातील थंडीपासून संरक्षण करायचा. आता सरकारनं नागपूरला पावसाळी अधिवेशन घेण्याचा निकाल घेतल्यानं ब्लेझरऐवजी छत्री दिगूच्या सामानाची शोभा वाढवत होती. नागपूरमध्ये पावसात दिगू कधी गेला नव्हता. यापूर्वी केवळ तीनवेळा अपरिहार्यतेतून नागपूरला पावसाळी अधिवेशन घेतले गेले होते. मात्र आता यापुढं सरकारनं आपलं आर्थिक वर्ष जानेवारी ते डिसेंबर असं बदलून घेण्याचं ठरवल्यानं डिसेंबर महिन्यात होणारं अधिवेशन हे अर्थसंकल्पीय असणार आहे. मुंबईत कुठली आलेय थंडी? लोकलमध्ये गर्दीत पाऊल ठेवताच सर्वांग घामानं डबडबतं. दिगूनं घामाच्या ओशट कल्पनेनं चेहरा वेडावाकडा केला. दिगू पत्रकार झाला तेव्हा नागपूरचे हिवाळी अधिवेशन म्हटले की, तो अक्षरश: आनंदून जायचा. त्या काळात शेतात, फार्महाऊसवर, धाब्यांवर हुरडा पार्ट्या व्हायच्या. रोज रात्री कुठं ना कुठं निमंत्रण असायचं. थंडीमुळं अक्षरश: दातावर दात वाजतं असायचे. ऊन ऊन दोन घास पोटात गेल्यावर मजा यायची. विधिमंडळाच्या दोन्ही सभागृहात तर फॅशन शोला आल्यासारखं वातावरण असायचं. रंगीबेरंगी स्वेटर, मफलर, बंद गळ्याचे कोट, डिझायनर ब्लेझर. एखाद्या बड्या विवाह सोहळ्याला हजेरी लावल्यासारखं वाटायचं. नागपुरात गेल्यावर अचानक काही पत्रकारांना वाढलेल्या वजनाची जाणीव व्हायची.मुंबईत रात्री केवळ पाठ टेकण्याकरिता घरी जाणाऱ्या या पत्रकारांना मॉर्निंग वॉकची सुरसुरी यायची. सेमिनारी हिल, जपानी गार्डन असा मोठ्ठा परिसर सक्काळी सक्काळी तुडवत फिरताना आनंद व्हायचा. आता पावसाळ्यातील कुंद वातावरणात कोण बाहेर पाऊल टाकणार? शनिवार-रविवारी अधिवेशनाला सुटी असल्यावर ताडोबा, चिखलदरा, पेंच येथे निघणाºया सहली यापुढं अशक्यच. पत्रकारांच्या सहली, त्यांच्या पार्ट्या धुमधडाक्यात साजºया होत असताना नागपूरमधील वृत्तपत्रात हमखास प्रसिद्ध होणारी बातमी म्हणजे ‘सरकारी गाड्या घेऊन अधिकारी पिकनिकला’. आता पावसाळ्यात पिकनिक झाली नाही तर या बातमीचा अंकुर तरी कसा फुटणार? दिगूनं जड अंत:करणानं बॅग बंद केली. तेवढ्यात त्याच्या मित्र पत्रकाराचा फोन वाजला. दिगू, मनोरा आमदार निवास पाडत असल्यानं आणि सर्वच आमदारांची निवासाची पर्यायी व्यवस्था होत नसल्यानं यंदा नागपूरमध्येच हिवाळी अधिवेशन होईल, अशी चिन्हं आहेत. यंदाचं अधिवेशन झाल्यावर मग निवडणुकाच आहेत. पुढचं पुढील सरकार ठरवेल. हे ऐकून दिगूची कळी खुलली.- संदीप प्रधान