धुळे : भरधाव वेगाने आलेल्या एका कारने पुढे पायी चालत असलेल्या प्रथमेश अहिरे या तरुणाला जोरदार धडक दिली. यात गंभीर जखमी झालेल्या तरुणाचा उपचार घेताना मृत्यू झाला. ही घटना शिंदखेडा तालुक्यातील साळवे गावाच्या कच्चा रस्त्यावर रविवारी दुपारी घडला. शिंदखेडा पोलिसात सायंकाळी फरार कार चालकाविरोधात गुन्हा दाखल करण्यात आला.
शिंदखेडा तालुक्यातील चिमठाणे गाव शिवारातील चिमठाणे साळवे कच्च्या रस्त्यावरून प्रथमेश ऊर्फ पप्पू भीमराव अहिरे-धनगर (वय २३, रा. चिमठाणे, ता. शिंदखेडा) हा तरुण रविवारी दुपारी दीड वाजेच्या सुमारास पायी चालला होता. त्याच वेळेस एमएच १८-डब्ल्यू १२७३ क्रमांकाची कार भरधाव वेगाने येत होती. चालकाचे नियंत्रण सुटल्याने कार तरुणावर जाऊन धडकली. अचानक झालेल्या या घटनेमुळे प्रथमेश अहिरे हा दूरवर फेकला गेला. त्याच्या डोक्याला आणि शरीराच्या अन्य ठिकाणी गंभीर दुखापत झाली. घटनेनंतर कार चालक घटना स्थळावरून फरार झाला. गंभीर अवस्थेत पडलेल्या तरुणाला रुग्णालयात दाखल करण्यात आले. मात्र, उपचार सुरू असताना त्याचा मृत्यू झाला.
याप्रकरणी संतोष हिलाल धनगर (वय ४९, रा. चिमठाणे, ता. शिंदखेडा) यांनी रविवारी सायंकाळी ७ वाजता शिंदखेडा पोलिस ठाण्यात फिर्याद दाखल केली. त्यानुसार फरार कार चालकाविरोधात विविध कलमान्वये गुन्हा दाखल करण्यात आला.