तरुणाला मारहाण
धुळे : मेहुण्यांना शिवीगाळ का केली, असा जाब विचारणाऱ्या तरुणाला लोखंडी सळईसह हाता-बुक्क्याने मारहाण करण्यात आल्याची घटना शुक्रवारी सायंकाळी साडेसातच्या सुमारास साक्री रोडवरील यशवंतनगर भागात घडली. यात तरुणाच्या बहीण व मेहुण्यांना शिवीगाळ करीत धक्काबुक्कीदेखील करण्यात आली. याप्रकरणी सागर भावराव श्रीखंडे याने फिर्याद दाखल केल्याने चारजणांविरुध्द गुन्हा दाखल करण्यात आला.
फूस लावून पळविले
धुळे : तालुक्यातील सोनगीर गावातून एका अल्पवयीन मुलीला फूस लावून पळवून नेल्याची घटना शुक्रवारी पहाटे ४ च्यासुमारास घडली. सकाळी घरातून निघालेली मुलगी बराच वेळ होऊनदेखील परत न आल्यामुळे तिचा शोध घेण्यात आला. ती मिळून आली नाही. तिचे कोणीतरी अपहरण केले असावे, अशी शक्यता गृहीत धरून मुलीच्या आईने सोनगीर पोलीस ठाण्यात शुक्रवारी दुपारी फिर्याद दाखल केली आहे.