कोरोना विषाणूच्या प्रादुर्भावामुळे ब्रेक द चेनअंतर्गत शिवभोजन थाळी एक महिना नि:शुल्क उपलब्ध करून देण्याचे निर्देश दिलेले आहेत. शिवभोजन केंद्रांच्या थाळींची संख्या दीडपटीने वाढविण्यात आलेली आहे. हा वाढीव इष्टांक १५ एप्रिल ते १५ मे या एक महिन्याच्या कालावधीकरिता राहील. थाळ्यांची संख्या वाढवली असली, तरी खोटया नावाने तसेच त्याच त्या लाभार्थ्यांची छायाचित्रे शिवभोजन ॲपवर टाकली जाणार नाहीत, याची खबरदारी शिवभोजन केंद्रचालकांनी घ्यावी. असे आढळून आल्यास या केंद्रांवर दंडात्मक कारवाई करण्यात येईल. तसेच केंद्र रद्द करण्यात येईल, असा इशारा पुरवठा अधिकाऱ्यांनी दिला आहे. सर्व शिवभोजन केंद्रे ही सकाळी ११ ते सायंकाळी ४ वाजेपर्यंत सुरू ठेवून गरजूंना पार्सल सुविधेद्वारे शिवभोजन उपलब्ध करावे, अशा सूचना त्यांनी दिल्या आहेत. लाॅकडाऊनमध्ये गरजूंच्या उदरनिर्वाहाचा प्रश्न निर्माण होऊ नये, यासाठी शासनाने महिनाभर मोफत शिवभोजन देण्याचा निर्णय घेतला आहे. तसेच थाळ्यांची संख्यादेखील वाढवली आहे. यामुळे निराधार, गरजूंना आधार मिळाला आहे. त्यांच्या दोनवेळच्या भोजनाची चिंता मिटली आहे. परंतु या थाळ्या अपुऱ्या पडत असल्याची प्रतिक्रिया आहे. अनेक गरजूंना केंद्रावरून रिकाम्या हाताने परतावे लागते. त्यामुळे थाळ्यांची संख्या आणखी वाढविण्याची गरज आहे.
जिल्ह्यात वाढल्या ६९३ थाळ्या
धुळे जिल्ह्यात १४ शिवभोजन केंद्रे आहेत. त्यात नियमित १ हजार ३८५ थाळ्या मंजूर आहेत. लाॅकडाऊनमध्ये एका महिन्यासाठी ६९३ थाळ्या वाढविल्या आहेत. केंद्राचे नाव, वाढीव थाळ्या अशा : धुळे एसटी कॅन्टीन १८८, पद्मशेखर शिवभोजन १५०, साधना राहुल कचवे १५०, साईराम शिवभोजन १५०, राजस्थानी महिला बचत गट १५०, कृषी उत्पन्न बाजार समिती १८८, बसस्थानकसमोरील २६३, साक्री येथे आर्यन स्वयंसहायता बचत गट ११३, भारती कांतिलाल माळी ११३, हिंदुस्थान स्पोर्टस् ज्युडो कराटे असोसिएशन ११३, शिंदखेडा येथे कस्तुरबा खानावळ १६५, शिरपूर येथे पप्पाजी की थाली ११३, अरिहंत गृह उद्योग ११३, मनोज भिका धनगर ११३ अशी वाढीव थाळ्यांची संख्या आहे.