कापडणे येथील ग्रामपंचायत सदस्य, ग्रामविकास अधिकारी, गावातील विविध पदाधिकारी, पत्रकार आणि ग्रामस्थांनी कापडणे प्राथमिक आरोग्य केंद्राला सोमवारी सकाळी कोविड-१९ च्या उपाययोजनांसंदर्भात अचानक भेट दिली असता, त्यावेळेस येथे अनेक गैरसोयी आढळून आल्या.
ग्रामस्थ, लोकप्रतिनिधींनी वैद्यकीय अधिकारी नागे यांच्याकडे आरोग्यासंदर्भात विविध समस्या मांडल्या. आरोग्य विभागातील कर्मचारी सकाळी आठ तर सायंकाळी साडेपाच वाजतापर्यंत पूर्ण दिवसभर कामावर दिसून येत नाहीत. बहुतांशी कर्मचारी कामावर उशिरा येतात. काही कर्मचारी दांड्या मारतात. बरेच कर्मचारी कापडणे येथे मुख्यालय ठिकाणी कायमस्वरूपी राहत नसल्यामुळे रात्री-अपरात्री रुग्णांवर उपचार करण्यास मोठा अडथळा येतो.
एम. पी. डब्ल्यू. आरोग्य कर्मचारी डी. ए. पाटील व जी. के. महाजन यांनी गावात संशयित रुग्णांची कोरोना रॅपिड ॲन्टिजन चाचणी करून घेणे आवश्यक आहे. सर्व आरोग्य कर्मचाऱ्यांची कामाची वेळी संपूर्ण दिवसभर असूनसुद्धा मात्र दुपारी बारा वाजतानंतर बहुतांशी कर्मचारी घरी निघून जातात. रुग्णालयात दिवसाला व रात्रीला कोणत्या कोणत्या कर्मचाऱ्यांची ड्युटी आहे, तसा लिखित फलक वैद्यकीय अधिकाऱ्यांच्या मुख्य दालनासमोर लावण्यात यावा. जेणेकरून रुग्णांना याची माहिती होईल. जे कर्मचारी कामात कसूर करत असतील, अशा कर्मचाऱ्यांना वैद्यकीय अधिकाऱ्यांनी सरळ तक्रार नोटीस देऊन केलेल्या कारवाईचा आढावा ग्रामपंचायत सरपंच व ग्रामसेवक यांना सुपुर्द करावा. कामात हलगर्जी करणाऱ्या कर्मचाऱ्यांना यापुढे पाठीशी घालू नये, त्यांच्यावर ताबडतोब कारवाई करावी व कोणी राजकीय दबाव आणत असेल तशी वैद्यकीय अधिकाऱ्यांनी ग्रामपंचायत प्रशासनाला सूचना करावी, त्याचे निवारण केले जाईल, असे आवाहनही लोकप्रतिनिधींनी डॉक्टर नागे यांना केले आहे. दरम्यान कामात बऱ्याच सुधारणा केल्या जातील, अशी माहिती डॉक्टर नागे यांनी उपस्थित लोकप्रतिनिधींना दिली आहे.
यावेळी पंचायत समिती सदस्य राजेंद्र बाबूराव पाटील, विनय शाळेचे चेअरमन संजय युवराज पाटील, तंटामुक्त समिती अध्यक्ष नवल नामदेव पाटील, ग्रामविकास अधिकारी प्रवीण ठाकरे, उपसरपंच प्रतिनिधी अंजनकुमार पाटील, ग्रामपंचायत सदस्य अक्काबाई भिल, मनोहर पाटील, पत्रकार रामकृष्ण पाटील, जिजाबराव माळी, दीपक पाटील, भूषण ब्राह्मणे, विशाल शिंदे, भूषण पाटील, विठोबा माळी, माजी ग्रामपंचायत सदस्य शरद माळी, मनोहर माळी आदी उपस्थित होते.