ऐन उन्हाळ्यात जेसीबीच्या साह्याने लावली झाडे

शहरातील विद्यानगर व शिवाजीनगर भागात कॉलनीच्या मोकळ्या भूखंडावर ऐन उन्हाळ्यात निंबाची झाडे लावली आहेत. जेसीबी यंत्राच्या साह्याने खड्डे खोदून एक फूट बाय एक फूट या अंतरावर झाडे लावण्याचा नवीनच पराक्रम केला आहे. या झाडांना पाणी टाकण्याची कोणतीही सुविधा नाही. लावलेल्या झाडांना संरक्षण जाळी न बसविल्याने आदल्या दिवशी लावलेली झाडे गुरांनी खाऊनही टाकली आहेत. हा प्रयोग बघून कॉलनीतील रहिवासी एकत्र येत त्यांनी साक्री नगरपंचायतीला एक लेखी निवेदन सादर केले असून, ऐन उन्हाळ्यात तेही मार्च महिन्यात झाडे लावण्याचे प्रयोजन काय? या झाडांना पाण्याची कोणतीही व्यवस्था करण्यात आली नाही. त्यांना संरक्षण जाळी लावण्यात आली नाही आणि विशेष म्हणजे साधे फुलझाडसुद्धा एक फूट बाय एक फूट अंतरावर लावले जात नाही तेथे चक्क निंबाची झाडे त्या अंतरावर लावण्यात आली आहेत. त्यामुळे आश्चर्य वाटत आहे. हे असले प्रयोग त्वरित थांबवून नगरपंचायतीचे पैसे वाया घालवू नयेत, अशी मागणी कॉलनीतील रहिवाशांनी केली आहे.