- सुनील साळुंखे
शिरपूर (जि.धुळे) : तालुक्यातील सावळदे येथील तापीच्या पुलावरून नदीपात्रात उडी घेत एकाने आत्महत्या केल्याची घटना मंगळवारी सकाळी ९ वाजेच्या सुमारास घडली. सुनील मोहन पटेल (वय ३७, रा. गुजरखर्दे, ता. शिरपूर) असे आत्महत्या केलेल्याचे नाव आहे. याप्रकरणी शिरपूर शहर पोलिसात अकस्मात मृत्यूची नोंद करण्यात आली. त्यांच्या आत्महत्येचे नेमके कारण समजू शकलेले नाही.
शहरापासून तीन किलोमीटर अंतरावर असलेल्या गुजरखर्दे येथील सुनील पटेल हे सकाळी मुलीला शाळेत सोडण्यासाठी शिरपुरात आले होते. तेथून ते गावी गेले. गावी गेल्यानंतर स्वत:च्या मेडिकल दुकानावर जाऊन येतो असे त्यांनी घरच्यांना सांगितले. मात्र, ते मेडिकल दुकानावर न जाता दुचाकीने सावळदे पुलावर आले. तेथून त्यांनी तापी पात्रात उडी घेतली. त्यांच्या दुचाकीचा फोटो काहींनी सोशल मीडियावर टाकला. त्यामुळे नातेवाइकांसह ग्रामस्थांनी तापीच्या पुलावर धाव घेतली.
येथे पट्टीच्या पोहणाऱ्यांच्या मदतीने दुपारी १२ वाजेच्या सुमारास त्यांचा मृतदेह नदीपात्रातून बाहेर काढण्यात आला. त्यानंतर त्यांचा मृतदेह शिरपूर कॉटेल हॉस्पिटलमध्ये आणण्यात आला. शवविच्छेदन केल्यानंतर मृतदेह नातेवाइकांच्या ताब्यात देण्यात आला. याप्रकरणी शिरपूर शहर पोलिसात अकस्मात मृत्यूची नोंद करण्यात आली. त्यांच्या पश्चात आई, वडील, पत्नी, दोन मुले असा परिवार आहे.