रुग्णसंख्येने ओलांडला ३२ हजारांचा टप्पा
धुळे शहरासह जिल्ह्यात कोरोनाचा प्रसार कमी-अधिक असला तरी रुग्णसंख्येने ३२ हजारांचा टप्पा ओलांडला आहे, तर ४९७ कोरोनाबाधित रुग्णांचा मृत्यू झाला आहे. ही वाढणारी संख्या रोखण्यासाठी प्रशासनाने काही कठोर असे निर्बंध लावण्यास सुरुवात केली आहे़
निर्बंध लावण्यास सुरुवात
सुरुवातीच्या काळात दुपारी ४ वाजेपर्यंतच दुकाने सुरू ठेवण्याचे आदेश होते. व्यापाऱ्यांच्या मागणीनुसार ही वेळ वाढविण्यात येऊन सायंकाळी ६ वाजेपर्यंतची करण्यात आली. नंतरच्या काळात यात १ तासाने वाढ करून सायंकाळी ७ वाजेनंतर सर्व व्यापारी प्रतिष्ठाने, दुकाने, स्टॉल बंदचे आदेश पारित करण्यात आले आहेत. आता नव्या निर्बंधांनुसार रात्री ८ ते सकाळी ६ वाजेपर्यंत दुकाने पूर्णपणे बंदचे आदेश देण्यात आले आहेत.
काही दुकाने उघडी, तर काही बंद
सर्व प्रकारचे व्यवहार बंद असताना मात्र कारवाईची कोणत्याही प्रकारचा मुलाहिजा न बाळगता दुकाने सुरू असल्याचे ‘लोकमत’ने शुक्रवारी केलेल्या ‘रिअ‍ॅलिटी चेक’मधून समोर आले. रात्री साडेआठ वाजेच्या सुमारास दत्तमंदिर चौकासह परिसरात हॉटेल व काही दुकाने सुरू होती. ग्राहक ये-जा करीत होते़ नेहरू चौकात लगोलग तीन ते चार दुकाने खुली होती़ लाइटांचा झगमगाट सुरू होता, तसेच झाशी राणी पुतळा चौकात असलेले खाद्यपदार्थांचे स्टॉल देखील सुरू होते़ त्यानंतर आग्रा रोडवरील जवळपास सर्वच दुकाने बंद असताना मात्र राजकमल टॉकीज परिसरात दुकाने उघडी असल्याचे दिसताच गस्तीवर असणाऱ्या पोलीस गाडीने तिकडे आपली दिशा वळविली़ दुकान बंद करण्याची तंबी देताच पटापट दुकाने बंद झाली. तो पर्यंत दुकान सुरूच होती.
याठिकाणी होता शुकशुकाट
शहरातील अत्यंत वर्दळीचे ठिकाण असलेले कृषी उत्पन्न बाजार समितीचा आवार, प्रकाश टॉकीजचा चौक, फुलवाला चौक, कराचीवाला खुंट आणि बसस्थानकाचा परिसर. मात्र, या विविध ठिकाणी असलेली सर्व दुकाने बंद होती़ परिणामी केवळ रस्त्याने वावरणाऱ्यांशिवाय कोणीही दिसून आले नाही.