ट्रालाच्या धडकेत आजोबा ठार, नातू जखमी
चांदवड तालुक्यातील दलगाव येथील राजाराम तानाजी नरोटो (७९) व सचिन आनंद हालनोर (वय २१) हे दोघे दुचाकीने (क्र.एमएच १५- ईडब्ल्यू ५३०९) धुळ्याकडून पारोळ्याकडे जात होते. त्याच वेळी मागून भरधाव वेगाने येणाऱ्या ट्रालाने (क्र.जीजे ११-टीटी ८०९९) दुचाकीस जोरदार धडक दिली. या धडकेत राजाराम नरोटे हे जागीच ठार झाले, तर सचिन हालनोर हा जखमी झाला. हा अपघात २७ फेबुवारी रोजी दुपारी १२.३० वाजण्याच्या सुमारास कासविहीर शिवारात झाला. या प्रकरणी शांताराम नरोटे यांनी दिलेल्या फिर्यादीवरून धुळे तालुका पोलीस स्टेशनमध्ये ट्राला चालकाविरुद्ध गुन्हा दाखल करण्यात आलेला आहे.
दुचाकी घसरल्याने एक जण ठार एक जण जखमी
धुळ्यातील मोहाडी उपनगरातील संतोष एकनाथ चौधरी (वय ४०, रा.मोहाडी उपनगर) व किशोर बबन चौधरी (रा.पाटण, ता.चाळीसगाव) हे दुचाकीने (क्र.एमएच १९-डीआर ७२३७) जात असताना फागणे गावाच्या अलीकडे दुचाकी घसरली. त्यात संतोष चौधरी खाली पडले. त्यांना मार लागल्याने, त्यांचा मृत्यू झाला, तर किशोर चौधरी जखमी झाले. हा अपघात २६ फेब्रुवारी रोजी सायंकाळी ७ वाजेच्या सुमारास घडला. या प्रकरणी प्रमोद चौधरी यांनी दिलेल्या फिर्यादीवरून धुळे तालुका पोलीस स्टेशनला किशोर चौधरी यांच्याविरुद्ध गुन्हा दाखल करण्यात आला आहे. तपास सहायक पोलीस उपनिरीक्षक आर.एस. काळे करीत आहेत.
रिक्षा-दुचाकी अपघातात एक जण ठार
शिंदखेडा तालुक्यातील रोहोड फाट्याजवळ रिक्षा-दुचाकी यांच्यात झालेल्या अपघातात एक जण ठार झाल्याची घटना २० फेब्रुवारी रोजी झाली. त्या अपघाताची नोंद २७ रोजी शिंदखेडा पोलीस स्टेशनला करण्यात आली.
महेश छोटालाल शर्मा (रा.इटावा, मध्य प्रदेश, ह.मु.चिमठाणे, ता.शिंदखेडा) हे दुचाकीने फर्निचरचे लाकूड पाहण्यासाठी जात असताना, रोहोड फाट्याजवळ समोरून येणाऱ्या मालवाहू रिक्षाने दुचाकीला जोरदार धडक दिली. या अपघातात महेश शर्मा हे ठार झाले. या प्रकरणी रामप्रकाश शर्मा यांनी दिलेल्या फिर्यादीवरून शिंदखेडा पोलीस स्टेशनला मालवाहू रिक्षा चालकाविरुद्ध गुन्हा दाखल करण्यात आला आहे. तपास हेड काॅन्स्टेबल आर.एम. माळी करीत आहेत.
दोन दुचाकींच्या धडकेत एक जण ठार
दोन दुचाकींची समोरासमोर झालेल्या धडकेत एक जण ठार व एक जण जखमी झाल्याची घटना साक्री तालुक्यातील शिवाजीनगर फाट्याजवळ २६ फेब्रुवारी रोजी सायंकाळी ७.३० वाजण्याच्या सुमारास घडली.
भरत विष्णू पाटील (४०, रा.मोरशेवडी, ता.धुळे, ह.मु. खापर, ता.अक्कलकुवा) हे दुचाकीने (क्र.एमएच ३९-एए ९४४१) जात असताना, शिवाजीनगरच्या पुढे मागून येणाऱ्या दुचाकीने (एमएच १८-ए ९२५७) जोरदार धडक दिली. यात भरत पाटील व जीजाबाई पाटील हे खाली पडले. त्यात भरत पाटील यांचा मृत्यू झाला. या प्रकरणी प्रभाकर देवरे (रा. बोरीस) यांनी दिलेल्या फिर्यादीवरून निजामपूर पोलीस स्टेशनला दुचाकीस्वाराविरुद्ध गुन्हा दाखल करण्यात आलेला आहे. तपास पोलीस करीत आहेत.