लोकमत न्यूज नेटवर्क, धुळे : गुलमोहर विश्रामगृहात कोट्यवधी रुपयांची रक्कम केवळ समितीच्या सदस्यांना देण्यासाठी जमा करण्यात आली होती. त्यामुळे विशेष दर्जाच्या अधिकाऱ्यांकडून चौकशी करून जबाबदार असलेल्या समितीच्या ११ सदस्यांवर गुन्हे दाखल करावेत, अशी मागणी धुळ्याचे माजी आमदार अनिल गोटे यांनी पत्रकार परिषदेतून केली.
धुळे जिल्हा पोलिसांकडे कुठल्याही प्रकारच्या गुन्ह्याची नोंद झालेली नाही. कुठलाही गुन्हा रजिस्टर नसताना किंवा एफ. आय. आर.देखील नसताना धुळे पोलिस कुठल्या कायद्याखाली तपास करीत आहे. वास्तविक पोलिसांकडून या प्रकरणाचा तपास करण्यासाठी बोटांचे ठसे घेणे अपेक्षित होते तसेच रूम उघडल्यानंतर, रूममधील जागेचा स्वतंत्र पंचनामा, भरलेल्या बॅगा व ज्या बॅगांतून पैसे गायब झालेले होते अशा रिकाम्या बॅगांचा पंचनामा करणे अपेक्षित होते. परंतु ते पोलिसांनी केलेले नाही. त्यामुळे राज्यातील पोलिस यंत्रणेवर माझा विश्वास नाही, सीआयडी, ॲन्टी करप्शन, धुळे पोलिसांची प्रतिमा जनमानसात मलीन झाल्याचे माजी आमदार गाेटे यांनी सांगितले.