राजेंद्र शर्मा
धुळे : धूमस्टाईल दुचाकीवरुन आलेल्या दोघांपैकी एकाने तरुणाच्या हातातून मोबाईल हिसकावून पोबारा केला. ही घटना बुधवारी सायंकाळी ५ वाजेच्या सुमारास बालाजी नगर भागात घडली. आरडा ओरड होत नाही तोपर्यंत दोघे अनोळखी पळून जाण्यात यशस्वी ठरले. याप्रकरणी शिरपूर शहर पोलिस ठाण्यात रात्री जबरी चोरीचा गुन्हा दाखल करण्यात आला.
नंदुरबार जिल्ह्यातील शहादा तालुक्यातील गोगापूर येथील द्रव्या रविंद्र पाटील हा तरुण शिक्षणासाठी शिरपूर नगरीत वास्तव्यास आहे. शिरपूर येथील बालाजी नगराच्या बोर्डाजवळून तो माेबाईलवर बोलत जात होता. बुधवारी सायंकाळी ५ वाजेच्या सुमारास त्याच्या पाठीमागून दोन अनोळखी तरुण दुचाकीवरुन भरधाव वेगाने आले. त्यापैकी एकाने तरुणाच्या हातातून जबरदस्तीने ८ हजार रुपये किंमतीचा मोबाईल हिसकावून घेतला. दोघांनी दुचाकीवरुन पळ काढला. तरुणाने आरडा ओरड केला पण त्याचा काही उपयोग झाला नाही.
याप्रकरणी शिरपूर शहर पोलिस ठाण्यात रात्री ११ वाजेच्या सुमारास फिर्याद दाखल करण्यात आली. त्यानुसार, भादंवि कलम ३९२, ३४ प्रमाणे गुन्ह्याची नोंद करण्यात आली. पोलिस हेड कॉन्स्टेबल लादूराम चौधरी घटनेचा तपास करीत आहे.