बुधवारी पहाटे ३ वाजेच्या सुमारास हाडाखेड तपासणी नाक्याजवळ सेंधवाकडून येणारी गाडी (क्र.पीबी-०३-बीएफ-६५८८) मध्ये कत्तलीकरिता जनावरे जात असल्याची माहिती सांगवी पोलीस ठाण्याचे सपोनि सुरेश शिरसाठ यांना मिळाली होती़ त्यानुसार पोलिसांनी सापळा रचून या गाडीला पकडले़ मध्य प्रदेशकडून महाराष्ट्रात गाईंची कत्तलीसाठी निर्दयतेने वाहतूक करणाऱ्या आयशरला पोलिसांनी ताब्यात घेतले असून १२ गाईंची सुटका केली तर राजस्थान येथील चालक साजित जाकीर हुसेन (वय २१, रा. रावतसर वार्ड क्रमांक ७, ता.रावतसर जि. हनुमानगड (राजस्थान) यास ताब्यात घेतले आहे.
सुरुवातीला चालकाने उडवाउडवीची उत्तरे दिली. नंतर पोलिसांनी वाहनाची ताडपत्री उघडून बघितले असता वाहनात निर्दयपणे आखूड दोरीने बांधलेल्या परिस्थितीत १२ गाई मिळून आल्या. गायींची सुटका करून गो-शाळेत पाठविण्यात आले. त्यात २० हजार रुपयाप्रमाणे १२ गाईंची किंमत २ लाख ४० हजार रुपये तर आयशर गाडी १० लाख रुपये असा एकूण १२ लाख ४० हजारांचा मुद्देमाल जप्त करण्यात आला़ चालकाला ताब्यात घेवून त्याच्याविरुद्ध सांगवी पोलीस ठाण्यात पोकाॅ शामसिंग काड्या पावरा यांच्या फिर्यादीवरून गुन्हा दाखल करण्यात आला आहे. सदर कारवाई पोलीस अधीक्षक चिन्मय पंडित, उपविभागीय पोलीस अधिकारी अनिल माने यांच्या मार्गदर्शनाखाली सहायक पोलीस निरीक्षक सुरेश शिरसाठ, हवालदार पाटील, राजीवे गीते, संजय जाधव यांनी केली़