दरम्यान, येथील उपजिल्हा रुग्णालयात ९ व्हेंटिलेटर मिळालेले आहेत; परंतु ते बंद अवस्थेत आहेत. ते सुरू करण्यासाठी निधीची आवश्यकता असल्याचे गावितांकडे मागणी केली, मात्र त्यांनी खासदारऐवजी आमदार निधीचा उपयोग करा, असे सांगून स्वत:चा निधी देण्यास टाळाटाळ केली़
२२ रोजी येथील तहसीलदार केबिनमध्ये कोरोनासंदर्भात आढावा बैठक घेण्यात आली़ यावेळी खासदार डॉ़ हिना गावित, आमदार काशीराम पावरा, प्रांताधिकारी डॉ़ विक्रमसिंग बांदल, तहसीलदार आबा महाजन, नपा सीईओ अमोल बागुल, डीवायएसपी अनिल माने, पोलीस निरीक्षक हेमंत पाटील, बीडीओ युवराज शिंदे, तालुका वैद्यकीय अधिकारी डॉ़ प्रसन्न कुलकर्णी, उपजिल्हा रुग्णालयाचे वैद्यकीय अधीक्षक डॉ़ ध्रुवराज वाघ तसेच विविध विभागांचे अधिकारी उपस्थित होते़
उपजिल्हा रुग्णालयाचे वैद्यकीय अधीक्षक डॉ़ ध्रुवराज वाघ व तालुका आरोग्य अधिकारी डॉ़ प्रसन्न कुलकर्णी यांनी तालुक्यात वाढत असलेल्या कोरोना प्रादुर्भावाची माहिती खासदार गावितांना दिली.
शहरातील परिस्थिती नमूद करताना डॉ़ वाघ म्हणाले, उपजिल्हा रुग्णालय फक्त कोविड रुग्णांसाठी घोषित केलेले आहे. १०० बेड असलेल्या रुग्णालयात सर्व बेड भरलेले आहेत. तालुक्यातील शासकीय रुग्णालयात एकमेव मोठे रुग्णालय असल्याने तालुक्यातील गंभीर आजार असलेल्या, विविध गुन्ह्यांत शारीरिक इजा झालेल्या आणि आवश्यकतेनुसार मृत झालेल्या काही व्यक्तींचे पीएमदेखील उपजिल्हा रुग्णालयात करावे लागत असल्याने कामांचा ताण वाढत आहे. उपजिल्हा रुग्णालयात अनेक पदे रिक्त असून उपलब्ध कर्मचाऱ्यांमध्ये सर्वतोपरी काम करत आहोत शिवाय अनेक कर्मचाऱ्यांना कोरोनाची बाधा झाल्याने ते वैद्यकीय उपचार घेत आहेत. त्यावर खासदार गावित म्हणाल्या, तालुका आरोग्य विभागाकडून आवश्यकतेनुसार कर्मचारी घ्या. त्यांना रोटेशन पद्धतीने ड्यूटी लावा. जेणेकरून उपजिल्हा रुग्णालयावर येत असलेला ताण कमी होईल. तसेच कोविड व्यतिरिक्त असलेल्या रुग्णांना नगरपालिकेच्या इंदिरा गांधी मेमोरिअल हॉस्पिटलमध्ये पाठवा.
तालुका आरोग्य अधिकारी डॉ. कुलकर्णी म्हणाले, शिंगावे कोविड सेंटरमध्ये १०० बेडची व्यवस्था करण्यात आली आहे. त्यातील २५ बेड ऑक्सिजन आहेत तर ७५ बेड साधारण आहेत. सद्य:स्थितीत येथे ४८ रुग्ण उपचार घेत आहेत. उर्वरित आरोग्य कर्मचारी कोविड रुग्णांचे ट्रेसिंग आणि लसीकरण सर्वेक्षण करत आहेत. यावर खासदार गावित म्हणाल्या, ग्रामीण भागात असलेल्या आरोग्य कर्मचाऱ्यांना अचूक आणि काटेकोरपणे सर्वेक्षण घेण्याचे निर्देश द्या. कोविड रुग्ण असलेल्या परिवारातील सर्व सदस्यांची तत्काळ कोरोना चाचणी करा. त्यातील कोणी पॉझिटिव्ह आल्यास त्यांना जवळच्या कोविड सेंटरमध्ये घेऊन जा. परिवारात एकाही व्यक्तीला कोरोना झाल्यास त्या व्यक्तीच्या परिवारातील अन्य सदस्य सुपरस्प्रेडर म्हणून काम करत असतात म्हणून त्यांना होम आयसोलेशनचे सर्व नियम समजावून सांगा.
तहसीलदार आबा महाजन म्हणाले, तालुक्यात आॅक्सीजन सिलेंडरचा तुटवडा असल्याने तालुक्यातील शिक्षकांनी २६ आॅक्सीजन सिलेंडर आरोग्य विभागाला उपलब्ध करून दिले. परंतु ते सिलेंडर भरण्यास अडचणी येत आहेत.
तद्नंतर डॉ़वाघ शिरपूर उपजिल्हा रुग्णालयाला हक्काचे ९ व्हेंटिलेटर मिळालेले आहेत. परंतु ते बंद अवस्थेत आहेत. ते सुरू करण्यासाठी निधीची आवश्यकता असल्याचे गावीतांना संगितले. त्यावर गावीत यांनी हा निधी आमदार काशीराम पावरा यांच्या आमदार निधीतून घेण्यास सांगितले. एकंदरीत खासदार गावीत यांनी आजच्या आढावा बैठकीत मार्गदर्शनाशिवाय काहीच ठोस मदत शिरपूर तालुक्याला दिली नाही.
आदिवासी भागात लसीकरणाविषयी अजूनही गैरसमज आहेत. त्यामुळे प्रशासनाने यासंदर्भात मोहीम राबवली पाहिजे.
ग्रामीण भागात तसेच शहरात असलेल्या होम आयसोलेशनमधील रुग्णांच्या संदर्भात प्रशासनाला सूचना दिलेल्या आहेत. त्यात त्यांनी गावागावात असलेल्या होम आयसोलेशनमध्ये असलेल्या रुग्णांना घरी न राहू देता त्या गावात असलेल्या जिल्हा परिषद शाळा, शासकीय आश्रमशाळा, मंगल कार्यालय अथवा इतर कोणत्यातरी कार्यालयात ठेवणे गरजेचे आहे. यासाठी प्रशासनाने तत्काळ कार्यवाही करण्याचे आदेश त्यांनी दिले आहेत. होम आयसोलेशन मधील हे रुग्ण सर्वदूर फिरत आहेत. तसेच शहरात व ग्रामीण भागात बाजाराला जात असल्यामुळे कोरोनाचा प्रादुर्भाव वाढण्यासाठी होम आयसोलेशनमधील रुग्ण कळीचा मुद्दा ठरत आहेत. त्यामुळे प्रशासनाने याकडे जाणीवपूर्वक लक्ष देणे गरजेचे असल्याची सूचना डॉ ग़ावित यांनी केली.