धुळे : घराच्या हिस्सेवाटणीवरून एकाला लाकडी दांडक्याने मारहाण केल्याची घटना शिरपूर तालुक्यातील खामखेडा गावात रविवारी रात्री घडली. याप्रकरणी सोमवारी मध्यरात्री गुन्हा दाखल करण्यात आला. शिरपूर तालुक्यातील खामखेडा येथील हिम्मत उत्तम कोळी (वय ३४) यांनी शिरपूर शहर पोलिस ठाण्यात फिर्याद दाखल केली. त्यानुसार, घराच्या हिस्सेवाटणीवरून वाद घालण्यात आला.
शिवीगाळ करत अंगावर धावून येण्याचा प्रकारदेखील घडला. वाद विकोपाला जात असतानाच जवळच पडलेल्या लाकडी दांडक्याने मारहाण करण्यात आली. यात डोक्यासह पाठीला आणि डाव्या हाताच्या मधल्या बोटाला गंभीर स्वरूपाची दुखापत झाली. एवढे होऊनही तुला सोडणार नाही अशी धमकीदेखील देण्यात आली. ही घटना रविवारी रात्री साडेआठ वाजेच्या सुमारास घडली. तातडीने जखमी अवस्थेत हिम्मत कोळी यांना रुग्णालयात दाखल करण्यात आले. प्राथमिक उपचार घेतल्यानंतर सोमवारी मध्यरात्री त्यांनी शिरपूर शहर पोलिस ठाण्यात फिर्याद दाखल केली. त्यानुसार, नाना भाईदास कोळी (वय ३४, रा. कामखेडा, ता. शिरपूर) याच्या विरोधात भादंवि कलम ३२४, ५०४, ५०६ प्रमाणे गुन्ह्याची नोंद करण्यात आली. पोलिस नाईक मनोहर पिंपळे घटनेचा तपास करीत आहेत.