धुळे : क्षुल्लक कारणावरून प्रौढाला लाकडी दांडक्याने मारहाण करण्यात आली. ही घटना साक्री रोडवरील मोतीनाला भागात गुरुवारी सकाळी घडली. जखमी झालेल्या इसमाला रुग्णालयात उपचारासाठी दाखल करण्यात आले होते. याप्रकरणी शहर पोलिस ठाण्यात शुक्रवारी सायंकाळी ४ जणांविरोधात गुन्हा दाखल झाला.
साक्री रोडवरील मोगलाईतील जाळीच्या पुलाजवळ राहणारा ऋषिकेश दिनेश देवरे (वय २२) या तरुणाने फिर्याद दाखल केली. त्यानुसार, रस्त्यावर कुत्रा का बांधला असे विचारल्याचा राग आल्याने वडील दिनेश रमण देवरे (वय ५५) यांना शिवीगाळ करीत लाकडी दांडक्याने मारहाण करण्यात आली. ही घटना साक्री रोडवरील विकास कॉलनीजवळील मोतीनाला येथे गुरुवारी सकाळी साडेनऊ वाजता घडली. एवढेच नव्हेतर तुझ्यासह घरच्या सदस्यांना जिवे ठार मारण्याची धमकी देण्यात आली. शिवीगाळसह मारहाण केल्यानंतर चार जणांनी घटनास्थळावरून पळ काढला.
ही घटना लक्षात येताच त्यांना तातडीने हिरे वैद्यकीय महाविद्यालयात उपचारासाठी दाखल करण्यात आले असून त्यांच्यावर उपचार सुरू आहेत. याप्रकरणी जखमी दिनेश देवरे यांचा मुलगा ऋषिकेश देवरे यांनी शहर पोलिस ठाण्यात फिर्याद दाखल केली. त्यानुसार, शुक्रवारी सायंकाळी पावणेसहा वाजता विविध कलमान्वये गुन्हा दाखल करण्यात आला. पोलिस हेड कॉन्स्टेबल वसावे घटनेचा तपास करत आहे.