उस्मानाबाद : कोरोनामुळे मागील दोन वर्षांपासून राष्ट्रीय व आंतरराष्ट्रीय बाजारात मोठ्या प्रमाणात आर्थिक अस्थिरता, औद्योगिक क्षेत्रात मंदीची लाट, गुंतवणुकीवरील व्याजदरात सातत्याने घट होत आहे. अशा परिस्थितीतही उस्मानाबाद जनता सहकारी बँकेने सन २०२०-२१मध्ये ४० कोटी रुपयांपेक्षा अधिक नफा मिळवल्याची माहिती अध्यक्ष ब्रिजलाल मोदाणी यांनी दिली.
राज्यातील उस्मानाबाद, लातूर, बीड, सोलापूर व अहमदनगर जिल्हा आणि कर्नाटक राज्यातील बीदर जिल्हा कार्यक्षेत्र असलेल्या उस्मानाबाद जनता बँकेची सर्वसाधारण सभा रविवारी पार पडली. यावेळी मोदाणी बोलत होते. बँकेने ३१ मार्च २०२१ अखेर २,८०० कोटी व्यवसाय वाढीचा टप्पा पूर्ण केला असून, चालू आर्थिक वर्षात तीन हजार कोटींपेक्षा जास्त बँकिंग व्यवसाय पूर्ण करण्याचा निर्धार केल्याचे सांगून रिझर्व्ह बँकेच्या पूर्वपरवानगीने ८ टक्के लाभांश देण्यात येणार असल्याचे मोदाणी यांनी जाहीर केले.
सद्यस्थितीत बँकेच्या राज्यात २८ तर कर्नाटकात दोन अशा एकूण ३० शाखा कार्यरत आहेत. यातील १५ शाखा कार्यालये ही बँकेच्या स्वमालकीच्या इमारतीत सुरू आहेत. बँकेकडून ग्राहकांच्या बदलत्या गरजा लक्षात घेत विविध ऑनलाईन सुविधा तसेच मागणीनुसार एटीएम कार्डदेखील देण्यात येत आहे. बँकेच्या अधिकृत भागभांडवलाची मर्यादा १०० कोटी झाली आहे. त्यामुळे एका भागाची किंमत १००वरून पाचशे रुपये करण्यात आली असून, सर्व भागधारक सभासदांनी याची नोंद घेऊन अपूर्ण भागाची रक्कम त्वरित आपल्या जवळच्या बँक शाखेत भरणा करावी, असे आवाहनही मोदाणी यांनी यावेळी केले.
प्रास्ताविक माजी अध्यक्ष विश्वास शिंदे यांनी केले. या सभेला बँकेचे माजी मुख्य कार्यकारी अधिकारी वसंत नागदे, भागवतराव धस, संजय दुधगावकर, बाळासाहेब शिंदे, संजय पाटील, श्रीकिशन भन्साळी, रवी ओझा, राजाभाऊ जंत्रे, नानासाहेब निंबाळकर, उदयभानू हलवाई, व्यंकटेश मोईंदे, बँकेचे मुख्य कार्यकारी अधिकारी शोभा वारद, सरव्यवस्थापक एम. बी. गायकवाड व कर्मचारी उपस्थित होते. बँकेचे उपाध्यक्ष आमदार वैजीनाथ शिंदे यांनी आभार मानले.