कळंब : गत अनेक महिन्यांपासून ‘प्रभारीराज’ असलेल्या कळंब येथील उपविभागीय पोलीस अधिकारी म्हणून एम. रमेश यांची नियुक्ती झाली असून, याठिकाणी प्रथमच आयपीएस सेवेतील अधिकारी कार्यरत राहणार आहेत.
कळंब येथील उपविभागीय पोलीस अधिकारी कार्यालयाच्या अंतर्गत कळंब, वाशी, येरमाळा, शिराढोण व ढोकी ही पोलीस ठाणे व त्या अंतर्गतची गावे येतात. या ठिकाणचे नियमित उपविभागीय अधिकारी सुरेश पाटील यांची माजलगाव येथे बदली झाली झाल्यानंतर अनेक महिन्यांपासून प्रभारीराज होते. अखेर या पदावर एम. रमेश यांची नियुक्ती झाली आहे. नंदुरबार येथून त्यांची या पदावर नियुक्ती झाली आहे.
एम. रमेश हे भारतीय पोलीस सेवेतील अधिकारी असून, त्यांची प्रशिक्षणार्थी म्हणून कळंब येथील रिक्त असलेल्या उपविभागीय पोलीस अधिकारी पदावर ही नियुक्ती झाली आहे. कळंब येथे अशाप्रकारे झालेली ही पहिलीच पदस्थापना आहे.
तहसीलदारपदी शिंदे नियुक्त
दरम्यान, येथील तहसीलदार मंजुषा लटपटे या दीर्घ रजेवर होत्या. या दरम्यानच्या काळात प्रभारी तहसीलदार म्हणून नायब तहसीलदार अस्लम जमादार, प्रशिक्षणार्थी तहसीलदार रोहन शिंदे यांनी कामकाज पाहिले होते. अखेर लटपटे यांच्या बदलीनंतर रिक्त असलेल्या या पदावर विद्या शिंदे यांची वर्णी लागली आहे. शिंदे या हिंगोली येथे सहायक पुरवठा अधिकारी म्हणून कार्यरत होत्या.