मान्सूनमध्ये वार्षिक सरासरीपेक्षा अधिक पाऊस झाल्याने यंदा प्रकल्पांत पाणीसाठा वाढला आहे. मुबलक पाणीसाठा असल्याने अनेक शेतकरी फळभाज्या व पालेभाज्यांच्या लागवडीकडे वळले आहेत. त्यामुळे बाजारात मागील अडीच महिन्यांपासून पालेभाज्यांची आवक वाढली आहे. परिणामी, भाज्यांचे दर दिवसेंदिवस घसरत आहेत. पत्ताकोबी, फ्लाॅवर, टोमॅटोचे दर उतरले आहेत. टोमॅटो पाच, पत्ता कोबी १०, फ्लाॅवर १० रुपये प्रतिकिलो दराने विक्री होत आहे. बटाटा २०, कारले, दोडका, वांगी, भेंडी ४० रुपये, गवार ५० रुपये दराने विक्री होत आहेत. शिमला मिरची ३०, हिरवी मिरची ४० रुपये प्रतिकिलो दराने विक्री झाली; तर शेवग्याचा तुटवडा कायम असल्याने शेवगा ८० रुपये प्रतिकिलो दरानेच विक्री हाेत आहे. पालेभाज्यांत पालक पाच रुपये जुडी, मेथी, शेपू, चुका १० रुपये जुडीप्रमाणे विक्री झाली.
डाळीचे भाव आवाक्यात
दोन महिन्यांपूर्वी डाळींचे दर वाढले होते. सध्या डाळींच्या दर कमी झाले आहेत. हरभराडाळ ५५, तूर ८८, उडीद ९०, मूग ९०, मसूर ६५ रुपये किलो दराने विक्री होत आहे. खाद्यतेलाचे दर पाच टक्क्यांनी उतरले आहेत. सोयाबीन तेल १२०, पामतेल ११५, मोहरी तेल १३०, शेंगदाणा तेल १३० रुपये किलोने विक्रीस आहे.
संत्र्याला मागणी
सफरचंद १०० ते १४० रुपये, चिक्कू ४० ते ५० रुपये, डाळींब १२० ते १६० रुपये, संत्रा ४० ते ५० रुपये किलो दराने विक्री होत आहे. केळी ३० रुपये डझनप्रमाणे विक्री होत आहे.
मेथी १० रुपये जुडी
मागील १५ दिवसांपूर्वी मेथी १० रुपयांस तीन जुडी विक्री होत होत्या. सध्या मेथीचे दर काही अंशी वाढले असून, १० रुपयांना एक जुडी विक्री होत आहे. कोबी पाच रुपये जुडी, पालक १० रुपये, शेपू, चुका १० रुपये जुडीप्रमाणे विक्री होत असल्याचे विक्रेत्यांनी सांगितले.
कोट
बाजारात शेवग्याचा तुटवडा असल्याने शेवगा महाग आहे. मात्र, इतर भाज्यांचे दर सामान्यांच्या आवाक्यात आहेत. त्यामुळे भाज्यांची खरेदी मनसोक्त केली जात आहे.
सुनील कांबळे, ग्राहक
मागील तीन दिवसांत तेलाचे दर पाच टक्क्यांनी घटले आहेत. येत्या १५ दिवसांत खाद्यतेलाचे दर आणखी उतरण्याची शक्यता आहे. शिवाय, डाळींचे दरही स्थिर आहेत.
अमित भराटे
किराणा व्यावसायिक
एक एकर क्षेत्रावर काकडीची लागवड केली आहे. लागवडीसाठी पाच हजार रुपये खर्च झाला. तो निघाला आहे. आणखी पाच हजार रुपये मिळू शकतात.
- विलास झांजे,
भाजीपाला उत्पादक