परंडा (जि़ उस्मानाबाद) : सावकाराच्या त्रासाला कंटाळून सुरेश सावता माळी-बनसोडे (५0) या व्यक्तीने शेतातील झाडास गळफास घेऊन आत्महत्या केली़ ही घटना भूम तालुक्यातील अंतरगाव येथे ५ आॅगस्ट रोजी घडली़ याप्रकरणी ८ आॅगस्ट परंडा पोलीस ठाण्यात सावकाराविरुद्ध गुन्हा नोंद झाला आहे.
भूम तालुक्यातील अंतरगाव येथील सुरेश माळी-बनसोडे यांनी काही महिन्यांपूर्वी जवळा (नि़) येथील भारत गवारे यांच्याकडून व्याजाने कर्ज घेतले. कर्ज वसूलीसाठी भारत गवारे व त्यांची सहकारी आशाबाई हे दोघे सुरेश माळी यांना उचलून नेण्याची धमकी प्रत्यक्ष तसेच मोबाईल फोनद्वारे देत होते़ त्यांच्या या त्रासास कंटाळूनच सुरेश माळी यांनी ५ ऑगस्ट रोजी शेतातील झाडास गळफास घेऊन आत्महत्या केली़ या प्रकरणी मयत सुरेश माळी यांचा मुलगा सुजीत माळी यांनी परंडा पोलीस ठाण्यात ८ ऑगस्ट रोजी फिर्याद दाखल केली. त्यावरुन उपरोक्त दोघांविरुध्द आत्महत्येस प्रवृत्त केल्या प्रकरणी गुन्हा नोंद झाला आहे.