महिला उपनिरीक्षकाच्या खुनाचा प्रयत्न, कॉन्स्टेबलला शिक्षा

मनिषा रामदत्त गिरी या महिला पोलीस उपनिरीक्षक म्हणून उस्मानाबाद शहरातील आनंदनगर ठाण्यात कार्यरत होत्या तेव्हा याच ठाण्यात चालक म्हणून कार्यरत असलेल्या आशिष ज्ञानाेबा ढाकणे याच्याशी त्यांचा परिचय झाला होता. त्यानंतर गिरी यांची शहर ठाण्यात बदली झाली होती. बदली झाल्याच्या दोन महिन्यांनंतर अनाहूतपणे एक अप्रिय घटना गिरी यांच्याबाबतील घडली. ३१ मे २०१९ रोजी सकाळी गिरी या राहत असलेल्या घरातील चौथ्या मजल्यावरून पडून गंभीर जखमी झाल्या होत्या. ही वार्ता शहरात पसरताच मोठी चर्चा घडून आली. याप्रकरणी आनंदनगर ठाण्यात त्याच दिवशी आत्महत्येचा प्रयत्न केल्याची नोंद करून घेण्यात आली. या घटनेचा तपास पोलीस उपाधीक्षक मोतीचंद राठोड यांच्याकडे सोपविण्यात आला. त्यांनी घटनास्थळी जाऊन बारकाईने तपास सुरू केला असता हा प्रकार आत्महत्येचा नसल्याचे लक्षात आले होते. मात्र, जखमी मनिषा गिरी या शुद्धीत नसल्याने तपासाला पुरेशी गती मिळू शकत नव्हती. दरम्यान, जवळपास महिनाभराने त्या मानसिकदृष्ट्या ठणठणीत झाल्यानंतर २९ जून २०१९ रोजी त्यांचा जबाब नोंदविण्यात आला. या जबाबात त्यांनी नोंदविलेल्या बाबी सुरुवातीच्या तपासातील शंकेला पुष्टी देणाऱ्या ठरल्या. आनंदनगर ठाण्यात चालक म्हणून कार्यरत असलेल्या आशिष ढाकणे याने गिरी यांना चौथ्या मजल्यावरून ढकलून दिल्याचे जबाबातून स्पष्ट झाल्यानंतर तपास पथकाने त्यास तातडीने ताब्यात घेत ३० जून रोजी खुनाच्या प्रयत्नाचा गुन्हा त्यावर नोंदविण्यात आला. गेली २ वर्षे तो काेठडीतच आहे. या प्रकरणाचा तपास उपाधीक्षक मोतीचंद राठोड यांनी पूर्ण करून न्यायालयात दोषारोपपत्र सादर केले. मनिषा गिरी यांचा जबाब, तपास पथकाने जमा केलेले सबळ पुरावे व सरकारी वकिलांचा युक्तिवाद लक्षात घेत आरोपीवरील गुन्हा सिद्ध होत असल्याने न्यायालयाने आशिष ढाकणे यास ७ खुनाचा प्रयत्न केल्याप्रकरणी दोषी धरत ७ वर्षे सश्रम कारावासाची शिक्षा सुनावली. सोबतच २५ हजार रुपयांचा दंडही न्यायालयाने आरोपीस सुनावला. हे प्रकरण पोलीस दलातीलच असल्याने बाहेर त्याची मोठी चर्चा घडून आली होती. त्यामुळे याप्रकरणाच्या निकालाकडे अनेकांचे लक्ष लागून होते.