पूर्णिया: बिहारच्या पूर्णिया जिल्ह्यात एक धक्कादायक घटना घडली आहे. जमिनीच्या वादातून एका व्यक्तीची हत्या करण्यात आली आहे. धक्कादायक बाब म्हणजे प्रेयसीनंच ही हत्या केली आणि प्रियकराचा मृतदेह तिच्या पलंगाखाली गाडला. घटना उघडकीस येताच आसपासच्या लोकांना धक्का बसला. संपूर्ण प्रकार पाहून पोलिसदेखील चक्रावले.
जमिनीचा वाद टोकाला गेल्यानंतर प्रेयसीनं प्रियकराची चाकू भोसकून हत्या केली. त्यानंतर तिनं त्याचा मृतदेह स्वत:च्या बेडरूममध्ये पलंगाखाली दफन केला. पूर्णिया पोलीस ठाण्याच्या हद्दीत राहणारे संपत पासवान एका आठवड्यापूर्वी बेपत्ता झाले. जमिनीचे व्यवहार करणाऱ्या संपत यांचं अपहरण झालं असावी अशी शंका कुटुंबियांनी होती. आता त्यांचा मृतदेह प्रेयसीच्या बेडरुममध्ये सापडला आहे.
सरना चौक परिसरात वास्तव्यास असलेल्या आशा देवी यांच्या घराची जमीन खोदून पासवान यांचा मृतदेह बाहेर काढण्यात आला. अवैध संबंध आणि जमिनीच्या वादातून संपत पासवान यांची हत्या झाल्याची माहिती एसडीपीओ सुरेंद्र कुमार सरोज यांनी दिली. आरोपी आशा देवीनं संपत यांची हत्या करून त्यांचा मृतदेह स्वत:च्या घरात पलंगाखाली गाडून टाकला.
संपत पासवान बेपत्ता असल्याची तक्रार आठवड्यापूर्वी त्यांच्या कुटुंबियांनी नोंदवली. पोलिसांनी संपत यांचा सीडीआर चेक केला. त्यानंतर आशा देवीला ताब्यात घेण्यात आलं. तिला पोलिसा खाक्या दाखवल्यानंतर तिनं हत्येची कबुली दिली. जमिनीच्या वादातून आशा देवीनं तिच्याच घरात संपत यांची चाकूनं हत्या केली. त्यानंतर साथीदारांच्या मदतीनं संपत यांचा मृतदेह पलंगाखाली दफन केला. हत्या करण्याआधी संपत पासवान, आशा देवी आणि तिचे साथीदार घरात दारू प्यायले. पोलिसांना घरात दारूच्या बाटल्या सापडल्या आहेत.