लोकमत न्यूज नेटवर्क, नवी मुंबई: आग्रोळी येथून दोन महिला चोरांना अटक करण्यात आली आहे. उघड्या दरवाजातून दोन्ही महिला घरात घुसल्या असता, कुटुंबाच्या सतर्कतेमुळे त्यांचा डाव फसला. या प्रकरणी सीबीडी बेलापूर पोलीस ठाण्यात गुन्हा दाखल करण्यात आला आहे.
आग्रोळी येथे राहणाऱ्या अतुल पाटील यांच्या घरी हा प्रकार घडला आहे. रविवारी सकाळी ६.४५ वाजण्याच्या सुमारास हा प्रकार घडला आहे. घराचा दरवाजा उघडा असल्याची संधी साधून कोणीतरी आत प्रवेश केला असल्याची चाहूल अतुल यांच्या पत्नी श्वेता यांना लागली. यामुळे त्या तळमजल्यावर आल्या असता दोन महिला दिसून आला. मात्र त्यांना पाहताच दोघीही पळू लागल्या असता त्यांना पकडण्याचा प्रयत्न केला. यावेळी एक महिला हाती लागली तर दुसरी घराबाहेर पळून गेली. यामुळे पाटील दांपत्याने आरडा ओरडा केला असता परिसरातील नागरिकांनी पळून जाणाऱ्या दुसऱ्या महिलेला देखील ताब्यात घेतली.
दोघींना पोलिसांच्या ताब्यात दिले असता, त्यांचे नाव करुणा काळे व किरण पवार असल्याचे समोर आले. दोघीही मूळच्या औरंगाबादच्या असून सकाळच्या वेळी परिसरात फेरफटका मारून दरवाजा उघडा असलेल्या घरांमध्ये चोरी करायच्या. काही दिवसांपासून नवी मुंबईत सकाळच्या वेळी चोरीचे प्रमाण अधिक वाढले आहे. त्यामुळे या महिलांकडून देखील अनेक गुन्ह्यांची उकल होण्याची शक्यता नाकारता येत नाही. दोघींविरोधात सीबीडी बेलापूर पोलीस ठाण्यात गुन्हा दाखल करण्यात आला असून पोलीस अधिक तपास करत आहेत.