- पंकज पाटील
अंबरनाथ : अंबरनाथमध्ये किरकोळ वादातून दोन गट भिडल्याची घटना घडली. गाडी चालवताना मध्ये आलेल्या तरुणाला हटकल्याने त्याने माजी नगरसेविकेच्या मुलीला शिवीगाळ केली असा आरोप नगरसेविकेने केला आहे. त्यामुळे माजी नगरसेविकेच्या समर्थकांनी शिवीगाळ करणाऱ्या तरुणावर वार केले. यानंतर संतापलेल्या जमावाने वार करणाऱ्या तरुणांना चोप देत माजी नगरसेविकेच्या घरावर दगडफेक केली.
अंबरनाथच्या बारकू पाडा परिसरात ही घटना घडली असून यानंतर परिस्थिती तणावपूर्ण बनली आहे. अंबरनाथच्या बारकूपाडा परिसरात राहणाऱ्या माजी नगरसेविका अनिता भोईर यांची मुलगी अबोली ही आज सायंकाळी कोर्टातून घरी येत असताना फासेपारधी समाजातील एक तरुण रस्त्यावर आडवा चालत जात होता. त्यामुळे अबोली हिने या तरुणाला बाजूला होण्यासाठी तीन वेळा गाडीचा हॉर्न मारला. मात्र हा तरुण बाजूला न झाल्यामुळे अबोलीने त्याला हटकले असता त्यांच्यात शाब्दिक वाद होऊन या तरुणाने अबोलीला शिवीगाळ केली असा आरोप अबोली यांनी केला आहे. तर दुसरीकडे या तरुणाने अबोली हिनेच आपल्याला शिवीगाळ केली असा आरोप केला आहे. ही बाब समजताच अनिता भोईर यांचे समर्थक असलेल्या दोन तरुणांनी शिवीगाळ करणाऱ्या फासेपारधी तरुणावर धारदार शस्त्राने वार केले. मात्र हे तरुण वार करून तिथून पळून जात असतानाच फासेपारधी समाजाने त्यांना घेराव घालत चोप दिला. तसेच त्यांचा पाठलाग करत थेट अनिता भोईर यांच्या घरावर दगडफेक केली.
या सगळ्या प्रकरणानंतर फासेपारधी समाजातील जखमी तरुण राजा घोरपडे याला उल्हासनगरच्या शासकीय मध्यवर्ती रुग्णालयात दाखल करण्यात आले असून त्याच्यावर उपचार सुरू आहेत. तर शिवाजीनगर पोलिसांनी बारकू पाडा परिसरात धाव घेत मोठा पोलीस बंदोबस्त तैनात केला असून गुन्हा दाखल करण्याची प्रक्रिया अजूनही सुरू आहे.