संशयातून क्रौर्य! मृतदेहासोबत १९१ किलोमीटरचा प्रवास; पोलीस हवालदारासह तिघांना ठोकल्या बेड्या

६ फेब्रुवारी रोजी लोणंद पोलिस ठाणे हद्दीतील सुखेड गावात एका शेतविहिरीत जळालेल्या अवस्थेतील मृतदेह आढळला होता.

सूर्यकांत वाघमारेनवी मुंबई - खंडाळा तालुक्यातील सुखेड गावातील शेतविहिरीत आढळलेल्या मृतदेह प्रकरणाचा उलगडा करण्यात पोलिसांना यश आले आहे. ही हत्या कळंबोलीत करून मृतदेह तब्बल १९१ किलोमीटर दूर नेऊन विहिरीत टाकणारा आरोपी नवी मुंबई पोलिस दलातील हवालदार असल्याचे उघड झाले आहे.

६ फेब्रुवारी रोजी लोणंद पोलिस ठाणे हद्दीतील सुखेड गावात एका शेतविहिरीत जळालेल्या अवस्थेतील मृतदेह आढळला होता. या प्रकरणी लोणंद पोलिसांनी तपासचक्रे फिरवत तीन दिवसांत या प्रकरणाचा उलगडा केला आहे. 

भेटीसाठी बोलावले आणि...सीसीटीव्ही फुटेजच्या आधारे पोलिस पुण्यातील एका संशयित कारपर्यंत पोहोचले. बंडू भिसे या रबाळे एमआयडीसी पोलिस ठाण्यात कार्यरत हवालदारानेच मित्रांच्या मदतीने हत्या केल्याचे निष्पन्न झाले. भिसे हा कळंबोलीतील रोडपाली येथे राहत होता. त्याच परिसरातील सोमनाथ बोबडे याच्याशी त्याची मैत्री होती; मात्र सोमनाथचे आपल्या पत्नीशी प्रेमसंबंध असल्याचा संशय भिसे याला होता. विजय पवार, किरण गायकवाड आणि श्रीनिवास लोणे यांना बोलावून  ५ फेब्रुवारीला सोमनाथला भेटीसाठी बोलावून तोंड दाबून निर्घृण खून केला. सहायक निरीक्षक शिवाजी जायपात्रे, उपनिरीक्षक रोहित हेगडे यांच्या पथकाने अधीक्षक तुषार दोषी यांच्या मार्गदर्शनाखाली  आरोपींना बेड्या ठोकल्या.

अटकेनंतरही कबुलीस नकार 

सोमनाथचा मृतदेह कारच्या पुढच्या सीटवर ठेवून स्वतः भिसे याने १९१ किलोमीटरचा प्रवास केला. अटकेनंतरही भिसे गुन्ह्याची कबुली देण्यास नकार दिला. मात्र, लोणंद पोलिसांनी त्याच्या साथीदारांना विश्वासात घेतल्यानंतर संपूर्ण घटनाक्रम उघड झाला.