नालासोपारा : विरारमध्ये राहणाऱ्या दांपत्यापैकी नवऱ्याचा मंगळवारी रात्री मृत्यू झाल्यानंतर घाबरलेल्या पत्नीने बुधवारी पहाटे गळफास लावून आत्महत्या केल्याची धक्कादायक घटना घडली आहे. विरार पोलिसांनी दोघांचे मृतदेह ताब्यात घेऊन शवविच्छेदनासाठी पाठवून अकस्मात मृत्यूची नोंद केली आहे.
काही दिवसांपूर्वी नवापूर येथे वडिलांचा मृत्यू झाल्यानंतर मुलीने आत्महत्या केली होती. त्याचप्रमाणे ही घटना घडली असून नवापूरची पुनरावृत्ती असल्याची विरारमध्ये चर्चा सुरू आहे. मनवेल पाडा येथील दादूस क्लासिक या इमारतीमध्ये नरेंद्रसिंह परमार (२४) आणि त्याची पत्नी संतोष परमार (२२) हे दोघेच भाड्याने राहत होते. या दोघांचे अडीच वर्षांपूर्वी लग्न झाले होते व मूलबाळ नव्हते. काही दिवसांपूर्वी संतोषचा लहान भाऊ यांच्यासोबत राहण्यासाठी आला होता.
नरेंद्रसिंहच्या पोटात मंगळवारी संध्याकाळी खूप दुखत असल्याने त्याला उपचारासाठी जवळच्या रुग्णालयात नेले व नंतर रात्री ११ वाजण्याच्या सुमारास तो घरी आला. परत पोटात दुखत असल्याने पत्नीने त्याला इनो दिला, पण काही उपयोग झाला नाही व त्याचा मृत्यू झाला. पतीचा मृत्यू झाल्याचे पाहून पत्नी संतोष घाबरली आणि तिने घरातच गळफास घेऊन आत्महत्या केली. तिचा लहान भाऊ बुधवारी सकाळी कामावरून आल्यावर दरवाजा उघडा नसल्याचे त्याने पाहिले.
दरवाजा उघडल्यावर बहिणीने गळफास घेतलेला मृतदेह तर भाऊजीचा मृतदेह त्याने पाहिल्यावर विरार पोलिसांना घटनेची माहिती दिली. विरार पोलिसांनी मृतदेह ताब्यात घेऊन शवविच्छेदनासाठी पाठवले आहेत.