अकोला : जुने शहर पोलिस स्टेशनच्या हद्दीतील वाशिम बायपास येथे अफरोज खान मन्नान खान (३२)रा. अली पब्लिक स्कूलजवळ, पातूर रोड यांच्यावर प्राणघातक हल्ला केल्याची घटना १३ जुलै रोजी रात्री घडली होती. त्यांचा उपचारादरम्यान मृत्यू झाला होता. याप्रकरणी जुने शहर पोलिसांनी फरार असलेल्या आरोपीला गुरुवारी बेड्या ठोकल्या आहेत.
अब्दुल रहमान मोहमद असलम तेली (२७)रा. मॉर्डन स्कुल जवळ गंगा नगर अकोला असे अटक करण्यात आलेल्या आरोपीचे नाव आहे. आरोपी व मृतकामध्ये काही आर्थिक देवाण-घेवाणचे व्यवहार होते. आरोपीने अफरोज खान यांच्यावर १३ जुलै रोजी रात्री १० वाजताच्या सुमारास वाशिम बायपास चौकात धारदार शस्त्राने हल्ला केला. अफराेज गंभीर जखमी अवस्थेत रस्त्यावर पडून होते.
जुने शहर पोलिसांनी त्यांना सर्वोपचार रुग्णालयात दाखल केले. परंतु युवकाची प्रकृती गंभीर झाल्यामुळे त्यांना खासगी रुग्णालयात हलविण्यात आले होते. उपचारादरम्यान १४ जुलै रोजी रविवारी त्यांचा मृत्यू झाला. याप्रकरणी जुने शहर पोलिस स्टेशनमध्ये दिलेल्या तक्रारीवरून पोलिसांनी फरार आरोपी अब्दुल रहमान मोहमद असलम तेली याच्यावर भारतीय न्याय संहिता कलम १०३ (१) अन्वये हत्येचा गुन्हा दाखल केला होता. सदर आरोपीला जुने शहर पोलिसांनी गुरुवारी अटक केली.