झांसी - प्रेमात वेडे झालेल्या २० वर्षीय तरुणाने प्रेयसीच्या घरासमोरच विष पिऊन आत्महत्या करण्याची धक्कादायक घटना घडली आहे. मृत्यूपूर्वी शूभमनं इन्स्टाग्रामवर तेरे बिना मरजावां...या गाण्यावर रिल बनवून शेअर केलं होतं. या रिलमध्ये त्यानं त्याचा आणि प्रेयसीचा एकत्र असलेला फोटो लावला होता. शूभमनं घेतलेल्या या टोकाच्या निर्णयामुळे त्याचा जीव गेला. या घटनेची माहिती मिळताच त्याचं कुटुंब घटनास्थळी पोहचले.
शूभम बेशुद्ध अवस्थेत हॉस्पिटलला पोहचला होता. परंतु डॉक्टरांनी तपासल्यानंतर त्याला मृत घोषित करण्यात आले. मृत शूभमच्या घरच्यांनी आरोप केलाय की, प्रेयसीच्या घरातील शूभमला जीवे मारण्याची धमकी देत होते. मिळालेल्या माहितीनुसार, शूभम वर्मा उर्फ गोलू झांसी हा बडागावच्या गेटबाहेर मास्टर कॉलनीत राहत होता. तो मेडिकल स्टोरमध्ये काम करायचा. मिशन कपाऊंडमध्ये राहणाऱ्या युवतीसोबत त्याचे अनेक महिन्यांपासून प्रेमसंबंध होते.
बुधवारी दुपारी शूभमने इन्स्टाग्रामवर रिल अपलोड केली. त्यात शूभम आणि त्याच्या प्रेयसीचा फोटो लावला होता. रिलमध्ये तेरे बिना मरजावा..हे गाणं पोस्ट केले होते. त्यानंतर तो बाईकवरून मिशन कपाऊंड येथे गेला. ज्याठिकाणी त्याची प्रेयसी राहत होती. तिथेच प्रेयसीच्या घरासमोर शूभमनं विष पिऊन आत्महत्या केली. शूभमचा भाऊ उमेशनं सांगितले की, प्रेयसीच्या वडिलांनी शूभमच्या मित्राला त्याने विष प्यायल्याची माहिती दिली. त्यानंतर आम्ही त्याठिकाणी पोहचलो. तेव्हा त्याची बाईक उभी होती. फोनदेखील सापडला. आजूबाजूला पाहिले असता तो मैदानात पडल्याचं आढळलं.
आम्ही तात्काळ शूभमला मेडिकल कॉलेज हॉस्पिटलमध्ये घेऊन गेलो. डॉक्टरांनी त्याला तपासून मृत घोषित केला. पोलिसांनी त्याचा मृतदेह पोस्टमोर्टमसाठी पाठवला आहे. शूभमच्या घरच्यांनी त्याच्या मृत्यूसाठी प्रेयसीच्या कुटुंबाला जबाबदार धरलं आहे. प्रेयसीच्या घरातील शूभमला नेहमी जीवे मारण्याची धमकी द्यायचे असा आरोप शूभमच्या कुटुंबीयांनी केला. सध्या पोलीस या घटनेची चौकशी करत आहेत. सर्व अँगलने या प्रकरणाचा तपास सुरू आहे. प्रथमदर्शनी शूभमने आत्महत्या केल्याचा संशय पोलिसांना आहे. मात्र पोस्टमोर्टम रिपोर्ट आल्यावर मृत्यूचं खरे कारण समोर येईल.
सर्व ठळक बातम्यांसाठी जरूर वाचा महाराष्ट्रातील अव्वल मराठी वेबसाईट "लोकमत डॉट कॉम"