मुंबई: व्यवसायिक आणि अभिनेत्री शिल्पा शेट्टीचा Shilpa Shetty) पती राज कुंद्राच्या (Raj Kundra) अडचणीत वाढ झाली आहे. अश्लिल चित्रपट प्रकरणात अडकलेल्या राज कुंद्राचा पाय दिवसागणिक आणखी खोलात जात आहे. या प्रकरणी दररोज नवनवे पुरावे पोलिसांच्या हाती लागले आहेत. मुंबई पोलिसांच्या गुन्हे शाखेकडून सुरू असलेल्या तपासातून काही धक्कादायक माहिती पुढे आली आहे. कुंद्रा एक मोठा आंतरराष्ट्रीय करार करण्याच्या तयारीत होता, अशी माहिती पोलीस दलातील सुत्रांनी दिली आहे. याबद्दलचं वृत्त न्यूज१८ इंडियानं दिलं आहे.
राज कुंद्रा १२१ पॉर्न व्हिडीओ ८ कोटी ९३ लाख २२ हजार १८० रुपयांना (१.२० मिलियन डॉलर) विकणार होता. मात्र त्याआधीच त्याला अटक झाली. आता पोलीस कुंद्राच्या येस बँक आणि युनायटेड बँक ऑफ आफ्रिकेतील खात्यांची आणि त्यामधून करण्यात आलेल्या व्यवहारांची चौकशी करत आहेत. राजनं ऑनलाईन बेटिंग केल्याचं त्याच्या बँक खात्यातून समोर आल्याची माहिती पोलीस सुत्रांनी दिली. राज पॉर्न व्यवसायातून मिळवलेले पैसे बेटिंगसाठी वापरत असावा असा संशय पोलिसांना आहे. या दृष्टीनंही पोलीस तपास करत आहेत.
२१ जुलैला राज कुंद्राला अटक करण्यात आली. त्यानंतर बराचसा डेटा डिलीट करण्यात आला. पोलीस आता हा संपूर्ण डेटा रिकव्हर करण्याच्या प्रयत्नात आहेत. मुंबई पोलीस दलाच्या गुन्हे शाखेनं वियान कंपनीच्या आयटी डेव्हलपरचा जबाबदेखील नोंदवला आहे. अश्लिल चित्रपटांची निर्मिती करणं आणि काही ऍपच्या माध्यमातून ते प्रसारित करणं या आरोपांखाली मुंबई पोलिसांनी १२ जुलैच्या रात्री राजला अटक केली. त्यानंतर २३ जुलैपर्यंत तो पोलीस कोठडीत होता. आज मुंबई उच्च न्यायालयानं त्याच्या कोठडीत वाढ केली. राजला २७ जुलैपर्यंत कोठडी ठोठावण्यात आली आहे.