ठाणे : ठाण्यातील जोशी बेडेकर (ठाणा कॉलेज) महाविद्यालयात एनसीसीच्या ज्या दहा विद्यार्थ्यांना एनसीसीचा वरिष्ठ कॅडेट शुभम प्रजापतीकडून मारहाण झाली. त्याच्या विरोधात तक्रार देण्यास नकार दिला. त्याचवेळी वादग्रस्त प्रजापतीला एनसीसीमधून निलंबित करण्यात आले. मारहाणीचा हा प्रकार संपूर्ण राज्यभर गाजत आहे. प्रजापतीविरुद्ध कोणतीही तक्रार करायची नसल्याचे ठाणेनगर पोलिसांना दिलेल्या जबाबामध्ये त्या विद्यार्थ्यांनी स्पष्ट केले. शिवाय, वैद्यकीय तपासणीलाही विरोध केला. दरम्यान, या प्रकरणी अदखलपात्र गुन्हा (एनसी) नोंदविल्याची माहिती पोलिस सूत्रांनी दिली.
ठाणा कॉलेजमध्ये २६ जुलै २०२३ रोजी सायंकाळी ५:४५ वाजण्याच्या सुमारास कारगिल दिनानिमित्त एनसीसीच्या विद्यार्थ्यांची परेड सुरू होती. याचदरम्यान यातील दहा विद्यार्थ्यांना प्रजापती मारहाण करत असतानाचा व्हिडीओ ३ ऑगस्ट रोजी प्रसारित झाला. हा व्हिडीओ एका माजी विद्यार्थिनीने महाविद्यालयाच्या लायब्ररीमधून अभ्यासादरम्यान काढला होता. या दहा विद्यार्थ्यांनी आणि महाविद्यालयाने पोलिसांना दिलेल्या माहितीनुसार, मारहाण करणारा प्रजापती हा भांडुपच्या कॉलेजमध्ये शिकायला आहे. तो ठाणा कॉलेजच्या एनसीसीच्या विद्यार्थ्यांना प्रशिक्षण देण्यासाठी येत होता.
ठाणा कॉलेजच्या विद्यार्थ्यांकडून वरिष्ठ अधिकाऱ्यांना मानवंदना देताना, बट सॅल्यूट करताना चूक केल्यामुळे शुभमने जितेंद्र रस्तोगी याच्यासह दहा मुलांना प्लास्टिकच्या पोकळ पाइपने मारले, अशी माहिती या मुलांनी ठाणेनगर पोलिसांना ३ ऑगस्ट रोजी जबाबामध्ये दिली. शुभम याच्याविरुद्ध आपली कोणतीही तक्रार नसून आपल्याला वैद्यकीय तपासणीही करायची नसल्याचे या मुलांनी पोलिसांना दिलेल्या जबाबामध्ये म्हटले आहे.
मारहाण झालेल्यांची नावे जितेंद्र रस्तोगी, सार्थक चोरमाले, अथर्व पवार, शुभम दाते, सोमराज शिंदे, कुणाल खरात, कुणाल कोळेकर, आकाश चतुर्वेदी आणि हर्ष धिवर अशी मारहाण झालेल्यांची नावे असून, त्यांनी आपली कोणतीही तक्रार नसल्याचे पोलिसांना सांगितले.
शुभमवर झाली निलंबनाची कारवाई एनसीसीच्या विद्यार्थ्यांना मारहाण करणाऱ्या शुभम प्रजापती याला एनसीसीमधून निलंबित केले आहे. ठाणेनगर पोलिस ठाण्यात पोलिसांनीच अदखलपात्र गुन्हा दाखल केला आहे.- गणेश गावडे, पोलिस उपायुक्त, ठाणे