मीरारोड - अमली पदार्थ विक्रेत्यास पकडून देणाऱ्या पोलिसांच्या खबरीचा पाठलाग करून तो न सापडल्याने हवेत गोलीबार करून पसार झालेल्या अमली पदार्थ तस्करी - विक्री करणाऱ्या माफिया टोळीच्या ६ जणांना मीरा भाईंदर - वसई विरार पोलिसांच्या गुन्हे शाखेने अटक केली आहे .
घोडबंदर गाव परिसरात राहणाऱ्या एका पोलिसांच्या खबरी ने दहिसर मधून अमली पदार्थांची विक्री करण्यास येणाऱ्या एका टोळीच्या तस्करास अमली पदार्थ विरोधी पथका द्वारे पकडून दिले होते . आपल्या टोळीच्या सदस्यास पकडून दिल्याचे समजल्यावर टोळीतील सदस्यांनी त्या खबरीचा काटा काढायचा म्हणून ३ जूनच्या पहाटे १ च्या सुमारास त्याचा पाठलाग केला . खबरी दुचाकी वरून चालला असताना त्याचा एक कार व एका दुचाकी वरून पाठलाग चालवला असता खबरी घोडबंदर गावा कडे जाणाऱ्या रस्त्याच्या एका आडोशाला लपला . पाठलाग करणारे पुढे वैभव शेठ कंपनी पर्यंत गेले असता खबरी न सापडल्याने त्यांनी बंदुकीतून २ गोळ्या हवेत फायर केल्या .
या प्रकरणी ३ जून रोजी काशीमीरा पोलिसात गुन्हा दाखल होऊन गुन्हे शाखेचे उपायुक्त डॉ . महेश पाटील व सहायक आयुक्त अमोल मांडवे यांच्या मार्गदर्शनाखाली मध्यवर्ती गुन्हे शाखेचे निरीक्षक राहुल राख व गुन्हे शाखा १ चे निरीक्षक अविराज कुऱ्हाडे , अमली पदार्थ विरोधी शाखेचे निरीक्षक देविदास हांडोरे व पथकाने तांत्रिक विश्लेषण , गोपनीय बातमीदार यांचेकडून आरोपी निष्पन्न केले .
पोलिसांनी शनिवारी विशाल ऊर्फ गचक्या मुत्तुस्वामी (२०) रा . खान कंपाऊंड शनी मंदिर चौक जवळ, दहिसर; राहुल ऊर्फ बॉक्सर विश्वकर्मा (२७) रा . पुनम अवेन्यु, ग्लोबल सिटी विरार; किशोर ऊर्फ कांच्या सिंग (२७) रा . संभाजी नगर चाळ, एस. व्ही रोड, दहिसर ; अनुराग म्हात्रे (२०) , रा. गायत्रीधाम , प्लेझंट पार्क, मीरारोड ; अभिजीत सुधाकर पाष्टे (२८) , रा . चंदनसार, विरार व विकास ऊर्फ विकी निणानिया (३०) रा. मनवेल पाडा, विरार ह्या ६ जणांना अटक करण्यात आली आहे . आरोपीं कडून १ गावठी पिस्तूल , २ मॅग्झीन, ५ जिवंत काडतुसे तसेच गुन्हा करतांना वापरलेली दुचाकी व कार जप्त करण्यात आली आहे .
दहिसर भागातून अमली पदार्थांची तस्करी व विक्री करणाऱ्या ह्या टोळीचा म्होरक्या सनी सालेकर असून तो सध्या कारागृहात आहे . त्याच्या टोळीतील सदर अटक केलेल्या आरोपीं पैकी काही जणांना तडीपार करण्यात आले असल्याची माहिती पोलीस सूत्रांनी दिली . काशीमीरा पोलीस या प्रकरणी पुढील तपास करत आहेत .