क्रूझ शिप ड्रग्ज पार्टी प्रकरणात आर्यन खानच्या अडचणी वाढल्या आहेत. गेले २० दिवस तुरुंगात असलेल्या आर्यनला अद्याप जामीन मिळालेला नाही. त्यातच आता या प्रकरणात अनेक बडे मासे अडकण्याची शक्यता आहे. बॉलिवूड अभिनेत्री अनन्या पांडेची काल नार्कोटिक्स कंट्रोल ब्युरोनं (NCB) चौकशी केली. आजही अनन्याला एनसीबीनं चौकशीसाठी बोलावण्यात आलं आहे.
आर्यन खानच्या फोनमध्ये त्याचं आणि अनन्या पांडेचं संभाषण सापडलं. त्यात एका ठिकाणी गांजाचा उल्लेख आहे. आर्यननं काही सोय होऊ शकते, अशी विचारणा अनन्याकडे केली आहे. त्यावर मी सोय करते, असं उत्तर अनन्यानं दिलं आहे. आर्यनच्या फोनमधील चॅट दाखवून एनसीबीच्या अधिकाऱ्यांनी अनन्याची चौकशी केली. त्यावर मी केवळ मस्करी करत होते, असं उत्तर अनन्यानं दिलं.
आर्यनसोबत सिगारेटबद्दल संवाद झाला. आम्ही अंमली पदार्थांबद्दल बोललो नाही, असं अनन्यानं एनसीबीला सांगितलं. तू अंमली पदार्थ घेतसे का, असा सवाल तिला विचारण्यात आला. त्यावर तिनं नाही असं उत्तर दिलं. चौकशीसाठी दाखल झालेली अनन्या काहीशी दडपणाखाली वाटत होती. एनसीबीच्या कार्यालयात पोहोचण्यापूर्वी ती कारमध्ये वडील चंकी पांडे यांना बिलगून रडली. त्यानंतर ती चौकशी कक्षात एकटी पोहोचली. तिथे एका अधिकाऱ्यानं तिची चौकशी केली.