विलास जळकोटकर, सोलापूर : हल्ली भांडण काढायला किरकोळ कारणसुद्धा पुरेसं आहे. कुर्डूवाडीच्या रेल्वे कॉलनीत रात्री एका पठ्ठ्यानं ‘दारू पाज नाहीतर ७० हजार रूपये उसने दे’ म्हणत फायटरने चोप दिला. यात अरुण जगन्नाथ गायकवाड (वय ५२, रा. कुर्डूवाडी, ता. माढा) यांच्या डोळ्याजवळ जखम झाली. त्यांच्या सर्वांगाला मुका मार लागला. कुर्डूवाडीच्या रेल्वे कॉलनीत ही घटना घडली. सोमवारी पहाटे त्याला सोलापूरच्या शासकीय रुग्णालयात दाखल केले आहे. यात जखमी झालेले अरुण गायकवाड (वय- ५२) हे रविवारी रात्री ८:३० च्या सुमारास रेल्वे कॉलनीतील मारुती मंदिराजवळ थांबले होते. यावेळी तेथे आलेला जितेंद्र घोडके याने अरुण यांना दारू पाजण्याचा आग्रह केला. दारू नाहीतर मग मला ७० हजार रुपये व्याजानं दे अशी अट घातली. यावर नकार दिल्याने चिडून जितेंद्र घोडके याने फायटरने मारहाण सुरू केली. यामध्ये अरुणच्या डोळ्याजवळ गंभीर दुखापत झाली. डोळ्याच्या सभोवतालचा भाग सुजला. सर्वांगालाही मुका मार लागला.
त्रास होऊ लागल्याने जखमी अरुण यांना कुर्डूवाडीच्या सरकारी दवाखान्यात प्राथमिक उपचार केले. डॉक्टरांच्या सूचनेनुसार सोमवारी पहाटे तीनच्या सुमारास सोलापूरच्या शासकीय रुग्णालयामध्ये मित्र शाकीर शेख याने त्यांना दाखल केले आहे. याची सिव्हिल पोलीस चौकीत नोंद झाली आहे.