शाहजहापूर: उत्तर प्रदेशातील शाहजहापूरात धक्कादायक घटना घडली आहे. पती पत्नीमधील वाद टोकाला गेल्यानंतर पतीनं पत्नीची निर्घृण हत्या केली आहे. डोक्यात पाटा घालून पतीनं पत्नीला संपवलं. पोलिसांनी आरोपी पतीला अटक केली आहे.
मृत महिलेच्या कुटुंबीयांनी पतीवर गंभीर आरोप केले आहेत. मूल नसल्यानं लोक आमच्या लेकीला वांझ म्हणत टोमणे मारायचे. तर दुसरीकडे तिचा पती वारंवार तिला गर्भपात करायला लावायचा, असा आरोप महिलेच्या कुटुंबानं केला आहे.
सेरामऊ दक्षिण पोलीस ठाण्याच्या हद्दीत येणाऱ्या चौहनापूर गावात वास्तव्यास असलेल्या हरिकांत त्रिपाठीनं त्याची पत्नी पिंकी त्रिपाठीची हत्या केली. स्वयंपाकघरात वाटणासाठी वापरल्या जाणाऱ्या पाट्यानं हल्ला करून हरिकांतनं पिंकीला संपवलं. वांझ असल्याचे टोमणे पिंकीला लोकांकडून ऐकावे लागायचे. तिचा पती वारंवार तिला गर्भपात करायसा लावायचा. यावरून दोघांमध्ये वाद व्हायचे. त्या वादातूनच हरिकांतनं पिंकीची हत्या केल्याचा आरोप कुटुंबीयांनी केला.
घटनेची माहिती मिळताच आम्ही हरिकांतच्या घरी पोहोचलो. तिथे पिंकीचा मृतदेह रक्ताच्या थारोळ्यात आढळून आल्याचं पोलीस अधीक्षक एस. आनंद यांनी सांगितलं. पिंकीच्या भावानं हरिकांतविरोधात तक्रार नोंदवली. हरिकांतला पहिल्या पत्नीपासून दोन मुलगे असून पिंकी त्याची दुसरी पत्नी होती, अशी माहिती त्यानं पोलिसांना दिली.