राजकुमार जाेंधळे
औसा (जि.लातूर) : शेतातील सालगड्याच्या अल्पवयीन मेहुणीवर अत्याचार केल्याची घटना घडली. यामध्ये मुलगी सहा महिन्यांची गर्भवती असल्याचे वैद्यकीय तपासणीत उघड झाले आहे. मागील सात ते आठ महिन्यांपासून आराेपी हा अल्पवयीन मुलीवर अत्याचार करत हाेता, शिवाय याबाबत काेणाकडे वाच्यता केल्यास जीवे मारण्याची धमकी देत हाेता. याबाबत औसा पाेलिस ठाण्यात ॲट्रॉसिटीसह अत्याचाराचा गुन्हा दाखल केला असून, आराेपी हा पसार झाला आहे.
पोलिसांनी सांगितले की, पीडित मुलगी बहिणीकडे राहण्यासाठी आली होती. दरम्यान, मेहुणा आराेपीच्या शेतात सालगडी म्हणून काम करीत होता. आरोपी हा सालगड्याच्या अल्पवयीन मेहुणीवर नजर ठेवत वारंवार शेतातील शेडकडे येत हाेता. आरोपीने पीडित अल्पवयीन मुलीला आपण नवरा-बायकोप्रमाणे राहू असे सांगत, सतत जबरदस्तीने अत्याचार केला. याबाबत बहिणीला, मेहुण्याला काही सांगितलंस, तर जीवे मारण्याची धमकी दिली. ही घटना सहा महिन्यांनंतर उघड झाली.
याबाबत पीडित मुलीची वैद्यकीय तपासणी केली असता, अल्पवयीन मुलगी ही सहा महिन्याची गर्भवती राहिल्याचे डाॅक्टरांनी सांगितले. या प्रकरणी औसा पाेलिस ठाण्यात दिलेल्या तक्रारीनुसार, आराेपीविराेधात ॲट्रॉसिटी, अत्याचाराचा गुन्हा दाखल करण्यात आला आहे. पोलिसांनी पीडितेचा जबाब नाेंदविला. तिने घडल्या प्रकाराचे कथन पाेलिसांसमाेर केले आहे. तपास औशाचे उपविभागीय पोलिस अधिकारी कुमार चौधरी हे करीत आहेत.