डोंबिवली: बापाने १० वर्षीय गतिमंद मुलीची गळा आवळून खून केल्याची मन हेलावून टाकणारी घटना पुर्वेकडील मानपाडा, माणगाव परिसरातील हरि म्हात्रे चाळीत रविवारी रात्री घडली. लवली मनोज अग्रहारी असे मृत मुलीचे नाव आहे. मनोज (वय ३८) या निर्दयी बापाला मानपाडा पोलिसांनी बेडया ठोकल्या आहेत. याबाबत मुलीची आई लिलावती हिने मानपाडा पोलिस ठाण्यात तक्रार दिली आहे.
लिलावती या बाहेर घरकाम करतात त्यांना चार मुली आहेत. एक मुलगी गावी तिच्या आजीकडे राहते. तर इथे तीन मुली राहतात. तीचा पती आरोपी मनोज हा एका किराणा स्टोअरमध्ये मालाची डिलेव्हरीचे काम करतो. त्यांची दुस-या क्रमांकाची मुलगी लवली ही जन्मापासून गतीमंद होती तिला बोलता व ऐकूही येत नव्हते. तिच्यावर उपचार करूनही कोणताही फरक पडत नव्हता. मनोजला दारूचे व्यसन होते. तो दररोज दारू पिऊन पत्नी लिलावती आणि चारही मुलींना मारझोड करायचा. लवली हिला मारहाण करताना हिचा तर काहीच उपयोग नाही, हिला एकदाचे कायमचे संपवावे लागेल असे नेहमी बोलायचा. मागील आठवडयात देखील त्याने घरात कोणी नसताना लवलीला मारहाण केली होती. यात तिच्या कमरेला दुखापत झाली होती.
रविवारी संध्याकाळी पत्नी लिलावती घरकाम करण्यासाठी बाहेर गेली होती. तर मोठी मुलगी कोमल (वय १४) ही देखील कामानिमित्त बहिण तनु (वय ४) हिला घेऊन बाहेर गेली होती. त्यावेळी घरात कोणी नाही हे पाहून मनोजकुमारने घरात असलेल्या लवलीचा कशानेतरी गळा आवळून खून केला आणि तो पसार झाला. या घटनेची माहिती मिळताच घटनास्थळी पोहोचलेल्या मानपाडा पोलिसांनी मनोजचा आजुबाजुच्या परिसरात शोध घेत त्याला बेडया ठोकल्या आहेत.
‘‘लवली मर गई है , जाकर देखो’’
आरोपी मनोजची मोठी मुलगी कोमल एका भंगार दुकानात साफसफाईचे काम करते. लवलीचा खून केल्यावर घराबाहेर पडलेला मनोज तिच्या कामाच्या ठिकाणी गेला. लवली मर गई है, जाकर देखो असे तिला बोलून पसार झाला. कोमलने लागलीच घर गाठले असता लवली निपचित पडल्याचे तीच्या निदर्शनास पडले. तीने हिची माहीती आई लिलावतीला दिली.